Lajme

Çfarë posedon Gruevski dhe sa fitime realizon ai në Hungari?

Kompania hungareze e ish-kryeministrit të Maqedonisë, Nikolla Gruevski edhe nën sanksionet e SHBA-ve arrin të fitojë dhjetëra mijëra euro në vit nga shërbimet e konsulencës, tregojnë të dhënat nga regjistri i kompanive hungareze, shkruan Kolegium.mk, njofton Portalb.mk.

Se kompania po operon në mënyrë të qëndrueshme me hyrje të rregullta tregon raporti i fundit i publikuar mbi llogarinë përfundimtare për vitin 2024. Regjistri i kompanive hungareze do t’i publikojë të dhënat nga llogaritë përfundimtare për vitin 2025 në muajin maj.

“Miku i mirë i ish-kryeministrit hungarez Viktor Orbán nga Maqedonia, Gruevski, një i dënuar që u arratis në Hungari në vitin 2018 dhe mori statusin e azilit, në verën e vitit 2021 vendosi ta themelojë kompaninë e tij të vogël në qytetin e vogël hungarez në rajonin e Pest, Pecs”, shkruan portali investigativ hungarez 444.hu.

Bëhet fjalë për kompaninë ICIC Kft., aktiviteti kryesor i së cilës janë shërbimet e konsulencës, e cila mbledh në bilancin e saj bankar me miliona forinta hungareze. Në njoftimin e “Open sanctions” qëndrojnë disa variacione të emrit të kompanisë, përfshirë këtu edhe ICIC LTD, e cila, përveç konsulencës, ka ofruar edhe shitje me shumicë të porcelanit, qelqit, produkteve për pastrim dhe organizim eventesh.

“Ai mund të ketë një klient fiks, sepse të ardhurat kanë ardhur në vitet e fundit, ndërsa vetë aktiviteti nuk është aspak me shpenzime intensive, prandaj ai mund të realizojë edhe një fitim të madh”, thuhet në lajmin e medias hungareze.

Në vitin 2024 ish-kryeministri i Maqedonisë ka fituar mbi 4 milionë forinta, ose rreth 11 mijë euro, ndryshe nga një vit më parë kur ka fituar 9.700 euro. Sipas të dhënave që i ka deklaruar, ai ka pasur shpenzime të vogla për kompaninë në vlerë prej 3.400 euro, që do të thotë se i kanë mbetur rreth shtatë mijë euro fitim. Nga këto, ai ka marrë 5 mijë euro si dividendë, kështu që gjatë 3 viteve të funksionimit të kompanisë shuma e përgjithshme e ish-kryeministrit ka arrirë në 16,7 milionë forinta, ose 45 mijë euro, shkruan 444.hu.

Raporti gjithashtu zbulon se edhe pse Nikolla Gruevski i ka tërhequr rregullisht pjesën më të madhe të fitimeve të kompanisë, në fund të vitit të kaluar në llogarinë bankare të kompanisë ka pasur rreth 8 milionë forinta.

“Por, një zhvillim krejtësisht i papritur është se kryeministri i dënuar jo vetëm që jep këshilla, por edhe me sa duket mund të marrë edhe kredi. Ai ka shënuar një borxh prej 2,52 milionë forintash, ose gjashtë mijë eurosh, në bilancin e tij”, thuhet në hulumtim.

Shërbimet e konsulencës së Gruevskit në Budapest i ka përdorur edhe ministri aktual i punëve të jashtme, Péter Szijjártó, i cili, sipas raportimeve të mediave hungareze, e ka pritur ish-kryeministrin e Maqedonisë në zyrën e tij dhe është konsultuar me të për çështje që kanë të bëjnë me Ballkanin Perëndimor. Sipas ministrit, Gruevski është ai nga i cili mund të marrë informacionin më të besueshëm për rajonin, pasi ka qenë kryeministër 10 vjet.

“Nëse duam të marrim informacionin më autentik rreth asaj që po ndodh në Ballkanin Perëndimor, si po zhvillohen proceset në Ballkanin Perëndimor, atëherë me kë do të flisnim nëse jo me një person që ka qenë kryeministër atje për 10 vjet? Dhe po, bisedojmë me të rregullisht. Nuk ka rëndësi se ku. Për shembull, unë bisedoj me të në zyrën time në Ministri. Dhe mendoj se është e natyrshme që zyrtarët e Ministrisë së Punëve të Jashtme të jenë në kontakt me një person që ka qenë kryeministër i vendit të tij për 10 vjet”, tha Szijjártó në parlamentin hungarez pas kritikave për takimet e tij me Gruevskin.

Për shkak të mënyrës së qeverisjes së tij Gruevski u gjend në listën e zezë në prill të vitit 2022. Arsyeja ishte aktgjykimi kundër tij dhe akuzat për raste të shumta korrupsioni, si dhe për shpërdorim të detyrës zyrtare, pastrim parash dhe krime të tjera që lidhen me kohën e tij si Kryeministër i Maqedonisë së Veriut nga viti 2006 deri në vitin 2016.

“Ai i është shmangur vazhdimisht arrestimit për dënimin e tij të vitit 2018 nga gjykata në Maqedoninë e Veriut për akuza që lidhen me korrupsionin, gjë që paraqet një goditje serioze ndaj përgjegjësisë për korrupsionin dhe aktivitetet që lidhen me korrupsionin në Maqedoninë e Veriut. Gruevski është pronar dhe drejtor i kompanisë hungareze I.C.I.C. KFT, e cila është e regjistruar si shoqëri me përgjegjësi të kufizuar në Hungari”, thuhej në njoftimin për sanksionet nga Departamentit i financave të SHBA-ve.

Sipas njoftimit në listën e zezë është futur edhe kompania e tij.

Ndërkohë, përkujtojnë mediat hungareze, atdheu i tij shiti një pjesë të pronës së konfiskuar. Shteti i sekuestroi apartamentet si pjesë e vendimit gjyqësor në rastin “Parcelat në Vodno”, për të cilin Gruevski u dënua në mungesë me 9 vjet burg, sepse, siç thuhet në vendim, ai përdori para nga donacionet e VMRO-DPMNE-së (mbi 1,3 milion euro) për të blerë pronë përmes një kompanie offshore.

Herën e fundit që Ministria e Drejtësisë e Maqedonisë ka kërkuar ekstradimin e Gruevskit ka qenë në vitin 2019, për të gjitha rastet kundër tij dhe për të cilat ishte lëshuar një urdhër arresti ndërkombëtar. Kjo në fakt ishte një plotësim i kërkesës së dërguar në vitin 2018.

Atëkohë autoritetet hungareze zyrtarisht e kanë njoftuar Maqedoninë se nuk do ta ekstradonin Gruevskin. Këtë vendim e mori Gjykata Supreme Rajonale me arsyetimin se nuk ishin përmbushur parakushtet ligjore për ekstradimin e Gruevskit, sepse me kërkesën e tij atij iu dha azil në Hungari dhe “në përputhje me Aktin nr. 38 për Ndihmën Juridike Ndërkombëtare në Çështjet Penale, një person të cilit i është dhënë azil nuk do të ekstradohet në vendin nga i cili është arratisur”.

Pas deklaratave të fundit të kryeministrit të ardhshëm hungarez Peter Magyar, i cili fitoi në zgjedhjet e 12 prillit, se nuk ka vend për kriminelë ndërkombëtarë në Hungari, Ministria e Drejtësisë e Maqedonisë njoftoi se kishte kërkuar informacion nga gjykatat në lidhje me Gruevskin, në mënyrë që të vazhdonte më tej.

Kryeministri aktual i Maqedonisë, Hristijan Mickoski, tha se nëse Gruevski kthehet në vend ai do të përfundojë në burg. Lidhur me ekstradimin e mundshëm, në deklaratën e tij të fundit kryeministri tha se i arratisuri fillimisht duhet ta humbasë statusin e azilantit në Hungari.

“Në rastin tonë, ish-kryeministri ka azil. Për të dërguar një kërkesë për ekstradim, duhet të ndiqet së pari një procedurë, për ta tërhequr statusin e azilantit. Kjo është gjëja e parë. Nëse e dërgojmë tani, do të marrim një përgjigje negative. Mund ta dërgojmë nesër, pa problem, por le t’i shohim gjërat në një mënyrë më substanciale”, tha Mickoski më 17 prill.

Gruevski u arratis në nëntor të vitit 2018, pak para datës kur duhej të hynte në burg për të vuajtur një dënim dyvjeçar me burg për rastin “Tanku” për blerjen e paligjshme të Mercedesit të blinduar. Ekzekutimi i këtij dënimi vjetërsohet në vitin 2024.

Për momentin kundër tij ka dy vendime të plotfuqishme. Njëri është dënimi i lartpërmendur me nëntë vjet për lëndën “Parcelat në Vodno”, i cili vjetërsohet në shkurt të vitit 2043, ndërsa i dyti për rastin “Dhuna në Qendër”, ku ai është dënuar me një vit e gjysmë, e që vjetërsohet në shtator të vitit 2027.

Raste aktuale gjyqësore në të cilat po gjykohet Gruevski në mungesë janë “Titaniku” për parregullsi zgjedhore dhe “Talir 2” për ndërtimin e paligjshëm të selisë së VMRO-DPMNE-së.

Lajme

Javën e ardhshme ulen çmimet e derivateve

Javën që vjen pritet ulje e vogël e çmimeve të derivative pasi në bursat botërore, një fuçi naftë është ulur për 3 dollarë, përkatësisht shënon 99,25 dollarë për fuçi. Përskaj kësaj siç pohoi kryeministri Hristijan Mickoski, Qeveria është në bisedime me furnizuesin e derivateve OKTA, që përskaj lirimit aktual të naftës për dy denarë, të ketë lirim shtesë periudhën që vijon. Sipas Mickoskit, Maqedonia e Veriut vazhdon të ketë çmimet më të ulëta të derivateve në rajon por ndoshta edhe në Evropë.

Pres sipas analizave të bursave si lëvizin nga java e kaluar, të kemi ulje të çmimit të dizelit dhe benzinës javën e ardhshme sepse në Qeveri këtë e analizojmë dhe e ndjekim. Por këtë do ta thotë Komisioni Rregullator për Energjetikë. Negociojmë me furnizuesin më të madh për derivate OKTA për një lirim shtesë, me çka do të jemi shtet me çmim më të ulët të derivateve në rajon por ndoshta edhe në Evropë.” Tha Hristijan Mickoski – Kryeministër

Ulja e çmimeve të derivateve mund të vijë edhe nga vendimi i djeshëm i anëtarëve të G7 të cilët vendosën të hapin rezervat e tyre të derivateve, përkatësisht 100 milion fuçi nafte. Kjo sipas presidentit francez Emanuel Makron, do të ndihmojë zbutjen e rritjes së çmimeve. Gjithashtu anëtaret e G7tës, janë pajtuar se nuk do të kufizojnë apo ndalojnë eksportimin e naftës mes vete. Megjithatë sipas ekspertëve, kjo paraqet një zgjidhje të përkohshme dhe nuk e zgjidhë problemin në periudhë afatgjate.

Ndonëse jemi në prag të sezonit të ngrohjes, kryeministri njoftoi se shteti është i përgatitur edhe përskaj krizës energjetike që ka kapluar kryesisht Evropën.

” “

Ne absolutisht mund të them se jemi të përgatitur. Termo blloqet në Manastir dhe Kërçovë po përfundojnë me rinovime apo do të përfundojnë deri në fund të muajit. Po përgatiten të gjitha resurset që TEC Oslomej dhe Manastir t’i përgjigjen sfidave. Hidro potenciali është diku 40% që paraqet mjaftueshëm për këtë periudhë të vitit.” Deklaroi Hristijan Mickoski – Kryeministër.

Mickoski gjithashtu theksoi se rishkimi i paralajmëruar i buxhetit do të ndodh nga mesi i muajit tetor./Alsat.mk

Lajme

Eli Fara më në fund del me reagimin e saj publik: Do vazhdoj me kokën lartë!

Këngëtarja e njohur Eli Fara ka reaguar këtë të shtunë pas publikimit të videove intime me kompozitorin Adrian Hila në rrjetet sociale, të cilat kanë qarkulluar ditët e fundit.

Në një reagim në rrjetin social Instagram, këngëtarja shprehet se është e lënduar, duke theksuar se nuk ka arsye të turpërohet. Ndërkohë, thekson se turpi u përket atyre që kanë filmuar ato video.

Sakaq, ajo ka theksuar se këtë rast do t’ia lërë në dorë drejtësisë.

Kam kaluar një jetë në skenë, duke ndarë me publikun këngën dhe dashurine për artin. Sot po përjetoj një dhimbje që nuk ia uroj asnjë gruaje: cenimin e privatësisë dhe përballjen me giykime e fyerje që prekin edhe familjen time.

Në këtë shoqëri, grave u kërkohet shpesh të mbajnë mbi supe edhe turpin e veprimeve që kryhen kundër tyre. U cenojnë privatësinë dhe pastaj u kërkojnë të japin llogari. I lëndojnë dhe pastaj i gjykojnë për mënyrën si e përballojnë dhimbjen. Asnjë grua nuk duhet të kalojë nëpër këtë poshtërim. Sot po e përjetoj vet sa e rëndë është të shohësh jetën tënde private te kthyer në spektakël dhe te ndiesh se, për disa njerëz, çdo gjë që ke ndërtuar vlen më pak se një moment intim.

Jam e lënduar, por nuk kam arsye të turpërohem. Turpi u përket atyre që filmojnë, publikojnë dhe shpërndajnë momente private pa dijeninë dhe pëlqimin e një njeriu. Intimiteti i një gruaje nuk është leje për ta poshtëruar.

Të qenit artiste nuk ma heq të drejtën për privatësi dhe dinjitet. Këtë të drejtë e ka çdo grua, pavarësisht emrit, profesionit apo zgjedhjeve të saj. Këtë çështje do t’ia lë në dorë drejtësisë. Nga

publiku kërkoj njerëzillëk dhe ndalimin e shpërndarjes. Përpara çdo gjykimi, mendoni për njeriun dhe familjen që lëndoni.

Falënderoj nga zemra familjen, miqtë, kolegët dhe të gjithë ata që me kanë mbështetur, publikisht apo privatisht. Dashuria dhe mirëkuptimi juaj me japin force.

Do të marr kohën që më duhet dhe do të vazhdoj përpara, me dinjitet dhe me kokën lart.

Lajme

Miliarderi rus financoi dasmën e Trump Jr./ Kush është Umar Kremlev dhe lidhjet e tij me Putinin

Umar Kremlev, 43 vjeç, një figurë e fuqishme e botës së boksit në Rusi dhe president i Shoqatës Ndërkombëtare të Boksit (IBA), është vënë në qendër të vëmendjes pas zbulimit se financoi një pjesë të festimeve të dasmës së Donald Trump Jr. në Bahamas.

Sipas një hetimi të ProPublica, Kremlev pagoi qindra mijëra dollarë për shpenzimet e dasmës, përfshirë marrjen me qira të një ishulli privat për disa net dhe një spektakël fishekzjarrësh. Çifti Trump Jr. dhe Bettina Trump e kanë konfirmuar se Kremlev organizoi dhe financoi dy net festimesh pas ceremonisë së martesës, duke e cilësuar pagesën si një dhuratë martese nga një mik.

Kremlev, i cili më parë njihej si Umar Lutfuloev, u rrit në Serpukhov, në jug të Moskës. Ai iu drejtua boksit që në moshë të re, por e ndërpreu karrierën sportive në moshën 19-vjeçare. Sipas burimeve të cituara në materialin investigativ, më pas ai u përfshi në organizimin e ndeshjeve të boksit.

Karriera e tij mori një kthesë të rëndësishme pas afrimit me rrethin e pushtetit në Rusi. Ai u bë pjesë e komunitetit të motoçiklistëve “Ujqërit e Natës”, të drejtuar nga Alexander Zaldostanov, i njohur si “Kirurgu”, i cili ka marrëdhënie të afërta me Vladimir Putinin.

Në vitin 2017, Kremlev mori drejtimin e Federatës Ruse të Boksit, ndërsa në vitin 2020 u zgjodh president i atëhershëm i Shoqatës Ndërkombëtare të Boksit Amator, AIBA, e cila më vonë u riemërtua IBA.

Nën drejtimin e tij, IBA forcoi marrëdhëniet me Gazprom-in, gjigantin shtetëror rus të energjisë. Organizata më pas u përplas me Komitetin Olimpik Ndërkombëtar, i cili në vitin 2023 i hoqi IBA-s statusin e federatës ndërkombëtare të njohur për boksin olimpik.

Kremlev ka qenë gjithashtu një figurë e zëshme në debatet rreth boksit të femrave. Gjatë Lojërave Olimpike të Parisit 2024, ai kritikoi vendimin e IOC për të lejuar Imane Khelif të garonte në kategorinë e femrave dhe i dërgoi një letër presidentit amerikan Donald Trump për këtë çështje.

Marrëdhënia mes Kremlev dhe Donald Trump Jr. u bë publike edhe përmes aktiviteteve të IBA-s. Të dy u shfaqën së bashku në një aktivitet në Stamboll, ku Kremlev e prezantoi Trump Jr. si mikun e tij. Sipas deklaratës së zëdhënësit të Trump Jr., ata u njohën përmes një miku të përbashkët dhe u afruan për shkak të interesit të përbashkët për gjuetinë, boksin dhe aktivitetet në natyrë.

Zbulimi se Kremlev kishte financuar një pjesë të konsiderueshme të festimeve të dasmës shkaktoi edhe një hetim në Kongresin amerikan. Robert Garcia, demokrati kryesor në Komitetin e Mbikëqyrjes së Dhomës së Përfaqësuesve, kërkoi të dhëna mbi marrëdhënien financiare dhe komunikimet mes Trump Jr. dhe Kremlev.

Donald Trump Jr. dhe bashkëshortja e tij e kanë mbrojtur marrëdhënien me Kremlev, duke thënë se pagesat ishin një dhuratë bujare nga një mik dhe se miqësia nuk kishte motiv politik. Zyra e Kremlev ka deklaruar gjithashtu se marrëdhënia mes dy burrave është miqësore dhe se ata janë takuar për herë të parë disa vite më parë.

Ndërkohë, vetë Donald Trump ka deklaruar se nuk e njeh Kremlevin dhe se nuk kishte dëgjuar më parë për të. Hetimi i ProPublica ka ngritur pyetje mbi natyrën e marrëdhënies mes Kremlev dhe Trump Jr., ndërsa vetë palët e përfshira e përshkruajnë atë si një marrëdhënie personale dhe miqësore.