Pas incidentit të 7 tetorit në Shkup, gjashtë policë do të suspendohen dhe ndaj tyre do të nisë procedurë disiplinore. Mesazhi i zëvendësministrit të Punëve të Brendshme është i qartë: uniforma nuk është mburojë për shkeljet e ligjit!

Pas shqyrtimit të incizimeve, deklaratave të dëshmitarëve dhe kontrolleve të brendshme, janë konstatuar parregullsi në veprimet e punonjësve policorë.

Zv/ministri thekson se përgjegjësia nuk do të ndalet te suspendimi. Në koordinim me prokuroritë kompetente, po vazhdon ekspertiza dhe dokumentimi i provave për të përcaktuar nëse ka përgjegjësi penale.

“As uniforma, as funksioni dhe as përkatësia nuk e përjashtojnë askënd nga zbatimi i ligjit”, është mesazhi i prerë i zëvendësministrit.

Ai nënvizon se përdorimi i papranueshëm i forcës dhe çdo shkelje e konstatuar duhet të marrin përgjigjen e merituar, ndërsa qytetarët kanë të drejtë të kërkojnë siguri, dinjitet dhe profesionalizëm nga policia.

Me këtë qëndrim, zv/ministri synon të përcjellë mesazhin se përgjegjësia institucionale nuk duhet të mbetet vetëm në deklarata, por të dëshmohet me masa konkrete dhe zbatim të barabartë të ligjit për të gjithë.

Ministria e Punëve të Brendshme (MPB) do të iniciojë procedurë disiplinore ndaj gjashtë punonjësve të policisë dhe do t’i suspendojë ata për shkak të parregullsive të konstatuara gjatë përdorimit të forcës fizike në një ngjarje që ka shkaktuar reagime të shumta në opinion, transmeton ZYRTARE.net

Sipas njoftimit të MPB-së, ngjarja ka ndodhur më 7 tetor 2026, kur punonjësit e policisë dyshohet se kanë përdorur forcë të tepruar fizike dhe kanë shkaktuar lëndime trupore ndaj personave gjatë ushtrimit të autorizimeve policore.

Departamenti i Kontrollit të Brendshëm, Hetimeve Kriminalistike dhe Standardeve Profesionale ka ndërmarrë masa për zbardhjen e rastit. Nga verifikimet, incizimet e siguruara dhe deklaratat e dëshmitarëve, janë konstatuar një sërë parregullsish në veprimet e policëve.

Për këtë arsye, ndaj gjashtë punonjësve të policisë do të iniciohet procedurë për shkelje të rendit dhe disiplinës në punë, ndërsa masa e paraparë është largimi i përkohshëm nga vendi i punës, përkatësisht suspendimi.

Ndërkohë, lidhur me kallëzimet për aspektet penale-juridike të rastit, prokuroritë kompetente kanë dhënë urdhra për ekspertiza, mbi bazën e të cilave po veprojnë institucionet përkatëse.

Nga MPB-ja bëjnë të ditur se, pas dokumentimit të plotë të provave, do të dorëzohen parashtresat përkatëse.