Lajme

Bajrami bashkon familjet! Mesazhe për harmoni e solidaritet

Pasi falën namazin e Bajramit në Xhaminë e Larme në Tetovë, besimtarët u kthyen nëpër shtëpi për të uruar për festën, fillimisht në familjen e ngushtë, e më pas nëpër farefis e të afërm.

Dashuria në familje e miq ishte thirrja e të gjithëve për këtë festë të Kurbanit.

-Mesazhi i festës në përgjithësi do të ishte që të jemi në harmoni, gëzim familjar, të vizitojmë farefisin dhe normalisht të kemi kujdes përderisa shkojmë nëpër rrugë, me parkimin, dhe gjithashtu mit kurbanin e me të gjitha të tjerat.

-Të jenë të lumtur, të kalojnë sa më mirë.

-Sa më shumë vijnë, aq më mirë është. Të jenë të gëzuar me njëri-tjetrin, me familjarët. Bajrami sjell bujarinë, bujarinë e njerëzimit. I kënaq njerëzit mes vete dhe i bashkon sa më shumë, i forcon.

-Duhet, duhet këtë të bëjmë, këto kushtet që duhen, apo? Po, duhet që t’i vizitojmë familjet, ato akrabatë.

Mes besimtarëve, takuan edhe një turist nga Turqia.

-Respekt dhe dashuri për atdheun nga toka e të parëve tanë, Maqedonia. Ne ju duam të gjithëve. Gjeografia e Ballkanit është shumë e bukur, ka pasur gjithmonë një vend të veçantë në zemrat tona. Baballarët tanë, të parët tanë kanë jetuar këtu. Edhe ne më pas kemi migruar në Stamboll, në Turqi.

Imami i Xhamisë së Larme, Emir Kasami, duku uruar besimtarët, kujtoi porosinë e Zotit në Kuran, kur thotë se ‘Tek Ai nuk arrin as gjaku i kurbanit, as mishi i kurbanit, por arrin dorëzimi dhe flijimi juaj që e bëni për hir të Allahut’. Dha edhe një mesazh – qytetarët të kenë kujdes ku i hedhin mbetjet e kurbaneve.

“Unë të gjithë besimtarët i porosis që të kenë kujdes, sidomos me të mbeturat e kurbanit, që mos t’i hedhin në rrugë. Të kenë kujdes me pastërtinë, pasi që pastërtia në Islam është gjysma e besimit, gjysma e imanit. Dhe nga ky aspekt të kenë kujdes dhe… normalisht, që të ngasin edhe me kujdes, pasi që të gjithë dalim për ta gëzuar festën, dhe mos të ndodhë ndonjë aksident, ose të lëndohemi@, tha Emir Kasami.

Bajrami i Kurban, i njohur si Festa e Sakrificës, është një nga dy festat më të rëndësishme të kalendarit islam, e cila shënon edhe përmbylljen e ritit vjetor të Haxhit në Mekë. Përtej dimensionit fetar dhe faljes së namazit, kjo festë mbart një peshë të madhe sociale, ku theksi kryesor vihet te solidariteti njerëzor, ndihma ndaj shtresave në nevojë përmes shpërndarjes së kurbanit, si dhe vizitat familjare që synojnë afrimin e komunitetit.

Lajme

Gashi: Kurban Bajrami na kujton vlerat e humanizmit dhe bashkimit shoqëror

Kryetari i Kuvendit të Republikës së Maqedonisë së Veriut, Afrim Gashi, u ka drejtuar një mesazh urimi qytetarëve të besimit islam me rastin e festës së Kurban Bajramit, duke theksuar vlerat e sakrificës, humanizmit dhe afërsisë mes njerëzve.

Kur’ban Bajram banner
Në urimin e tij, Gashi vlerësoi se kjo festë e shenjtë përfaqëson një moment të rëndësishëm për forcimin e solidaritetit, mirëkuptimit dhe respektit të ndërsjellë në shoqëri. Ai theksoi se Kurban Bajrami rikujton rëndësinë e kujdesit për njëri-tjetrin dhe ndarjes së mirësisë me familjen, fqinjët dhe të gjithë ata që kanë nevojë për mbështetje dhe ngrohtësi njerëzore.

Sipas tij, festa shërben gjithashtu si thirrje për më shumë unitet, paqe dhe harmoni, duke forcuar bindjen se vetëm përmes bashkëpunimit mund të ndërtohet një e ardhme më e mirë për të gjithë qytetarët.

Në fund të mesazhit, në emër të Kuvendit dhe në emrin e tij personal, Gashi uroi që festa të sjellë begati, shëndet, qetësi shpirtërore dhe lumturi në familjet e qytetarëve myslimanë, duke përfunduar me urimin: “Urime Kurban Bajramin!”.

Lajme

Tragjedia në unazën e Shkupit, drejtori i Doganave: Kamioni nga Kosova i plotësonte të gjitha kushtet

Kamioni me targa të Kosovës që shkaktoi aksidentin e rëndë rrugor në unazën e Shkupit në të cilin humbën jetën katër persona, hyri në pikën kufitare të Bllacës, ishte bosh dhe nuk kishte parregullsi në procedurën doganore, tha Boban Nikolovski, Drejtor i Doganave të Maqedonisë, në një intervistë në “TV Telma”.

“Gjithçka që lidhej me procedurën doganore për automjetin e mallrave dhe shoferin i plotësonte të gjitha kushtet e kërkuara në procedurën doganore për të kaluar nëpër atë pikë kalimi kufitar. Ajo që ndodhi më vonë është një rast që duhet të shqyrtohet nga institucionet e tjera shtetërore”, tha Nikollovski.

Dirigjenti i parë i Operas dhe Baletit Kombëtar, baritoni Riste Velkov, djali i tij 20-vjeçar Adam dhe dy djemtë njëzetvjeçarë – Marko Gjorgjievski dhe Petar Milanov, miq të Adamit, janë të vdekurit në këtë aksident tragjik trafiku.

Kujtojmë se Prokuroria ka caktuar masën e paraburgimit për shtetasin e Kosovës i cili drejtonte automjetin.

Lajme

VLEN uron besimtarët myslimanë me rastin e Kurban Bajramit

Koalicioni VLEN ka përcjellë urimet e tij me rastin e festës së shenjtë të Kurban Bajramit, duke u dëshiruar të gjithë besimtarëve myslimanë paqe, shëndet, mirësi dhe begati në familjet e tyre.

Në mesazhin e urimit, VLEN thekson se Kurban Bajrami është një festë që bart vlera të larta njerëzore dhe shpirtërore, duke kujtuar sakrificën, bujarinë dhe përkujdesjen ndaj të tjerëve.

“Le të jetë kjo ditë një mundësi për afrim mes njerëzve, për falje dhe solidaritet, ku askush nuk mbetet vetëm dhe ku fjala e mirë, vizita dhe dora e shtrirë marrin kuptim të veçantë”, thuhet në urimin e VLEN-it.
Nga koalicioni shprehen se fryma e Kurban Bajramit duhet të shërbejë si nxitje për forcimin e mirëkuptimit, respektit dhe bashkimit në shoqëri.