Lajme
Bulevardi “Cvetan Dimov” drejt tenderimit, vendkalimi në “Bit Pazar” në procedurë
Bulevardi “Cvetan Dimov” në Çair pritet të hyjë në procedurë tenderimi deri në fund të këtij viti, bëri të ditur kryetari i Qytetit të Shkupit, Orce Gjorgjievski, i cili tha se aktualisht po punohet për përfundimin e dokumentacionit të projektit, i cili më pas do t’u prezantohet edhe qytetarëve.
“Aty besoj se do të kemi një intensitet të fuqishëm, siç kemi në rrugën Brigada kosovaro-maqedonase, e cila është rrugë paralele me Cvetan Dimovin. Atje, nëse keni mundësi ju mediat, këto ditë zyrtarisht do të dalim në terren me kolegun Mexhiti. Atje kemi një lëvizje serioze, zgjerimi i trasesë ka filluar, ka filluar një ndërtim serioz i atij projekti kapital. Dhe nëse nuk e kam premtuar në programin tim parazgjedhor, kështu që pres të kthehem te “Cvetan Dimovi”, ta përfundojmë dokumentacionin e projektit, do ta prezantojmë këtë në publik, që të shihet”, tha Orce Gjorgjievski, kryetar i Qytetit të Shkupit
I pyetur edhe për kalimin për këmbësorët në afërsi të Bit Pazarit, Gjorgjievski deklaroi se Qyteti i Shkupit është duke përgatitur një projekt në bashkëpunim me SPB Shkup dhe se së shpejti priten masa konkrete.
“Projekti nga sektori i komunikacionit i Qytetit të Shkupit po përgatitet dhe, në bashkëpunim me SPB Shkup, dhe së shpejti do të ketë veprime”, theksoi Gjorgjievski.
Përndryshe, është e mbyllur ura që përdorej për të kaluar qytetarët, ndërsa vendkalimi tjetër është rreth 300 metra më tej.
Sa i përket bulevardit “Cvetan Dimov”, projekti parashihet të realizohet në segmentin nga kryqëzimi me “Nikolla Karevin” deri te kryqëzimi me “Xhon Kenedi”, me vlerë 150 milionë denarë dhe afat realizimi 2026-2028. Gjatë kësaj periudhe duhet të zgjidhen disa çështje: të përpunohet projekti, të kryhet shpronësimi i objekteve, të ruhen drunjtë, si dhe të planifikohet gjelbërimi qendror.
Lajme
Profesori universitar Festim Halili në Tiranë, ligjëron në Western Balkans University për teknologjinë që po ndryshon botën
Profesori i Universitetit të Tetovës, Festim Halili, ka qenë i ftuar në Western Balkans University në Tiranë, ku ka mbajtur një ligjëratë kushtuar Inteligjencës Artificiale Gjenerative, duke ndarë me studentët njohuritë dhe perspektivat e tij mbi zhvillimet e kësaj teknologjie.
Ligjërata u karakterizua nga pjesëmarrja aktive e studentëve nga vende të ndryshme, të cilët përmes pyetjeve, diskutimeve dhe ndërveprimit me ligjëruesin kontribuuan në pasurimin e debatit akademik.
Në këtë aktivitet mori pjesë edhe Doc. Dr. Avni Rustemi, i cili prezantoi njohuritë dhe përvojën e tij në fushën e teknologjive Blockchain.
Përmes këtij aktiviteti, Festim Halili dhe kolegu i tij kontribuuan në shkëmbimin e përvojave akademike dhe promovimin e inovacionit, teknologjisë dhe bashkëpunimit ndëruniversitar mes institucioneve akademike të rajonit.
Postim i plotë:
Me kënaqësi iu përgjigjëm ftesës së Western Balkans University në Tiranë, ku patëm mundësinë të ndajmë njohuri dhe perspektiva mbi Inteligjencën Artificiale Gjenerative.
Veçanërisht inspiruese ishte pjesëmarrja aktive e studentëve nga vende të ndryshme, të cilët përmes pyetjeve, tezave dhe diskutimeve interaktive i dhanë vlerë të shtuar ligjëratës.
Me këtë rast, edhe kolegu Doc. Dr. Avni Rustemi ndau njohuritë e tij mbi teknologjitë Blockchain.
Mirënjohje për mikpritjen dhe përkushtimin ndaj dijes, inovacionit dhe bashkëpunimit akademik!
https://www.facebook.com/share/p/1FTPra6VEX/
Lajme
Astrit Iseni: One Stop Shop me Shqipërinë, hap i ri drejt lehtësimit të qarkullimit në kufi
Zëvendësministri i Punëve të Brendshme, Astrit Iseni, ka theksuar se pas funksionalizimit të sistemit One Stop Shop me Republikën e Kosovës, po ndërmerret edhe hapi i radhës për zbatimin e këtij modeli të kontrollit të përbashkët kufitar me Republikën e Shqipërisë.
Sipas Isenit, marrëveshja me Shqipërinë parasheh përfshirjen e pesë vendkalimeve kufitare ndërmjet dy shteteve, me qëllim që qytetarët dhe transportuesit t’i nënshtrohen vetëm një kontrolli kufitar, duke shmangur procedurat e dyfishta dhe duke shkurtuar kohën e pritjes.
Një ndër risitë e kësaj marrëveshjeje është përfshirja e pikës kufitare të Qafë Thanës në sistemin e kontrollit të përbashkët hyrje-hyrje, ku procedurat kufitare do të realizohen vetëm një herë.
Iseni ka rikujtuar rezultatet e zbatimit të sistemit One Stop Shop me Kosovën, duke theksuar se pritjet në kufi janë shkurtuar ndjeshëm, ndërsa qarkullimi është rritur për 50 për qind krahasuar me vitin e fundit para funksionalizimit të këtij sistemi.
Duke komentuar proceset e bashkëpunimit rajonal, Iseni ka kritikuar qeverisjet e mëparshme, duke deklaruar se për 22 vite kanë pasur mundësinë dhe përgjegjësinë për të realizuar projekte të tilla, por se ato, sipas tij, kanë mbetur vetëm në nivel premtimesh.
Ai ka përmendur edhe projekte të tjera infrastrukturore dhe energjetike, si Korridori 8, aksi Shkup–Bllacë, lidhja Tetovë–Prizren dhe interkonjeksionet energjetike me Kosovën dhe Shqipërinë.
Sipas Isenit, këto projekte janë pjesë e një vizioni për forcimin e lidhjeve rajonale dhe lehtësimin e bashkëpunimit ndërmjet Maqedonisë së Veriut, Kosovës dhe Shqipërisë.
“Më pak pritje, më pak barriera, më shumë bashkëpunim”, është mesazhi me të cilin Iseni ka përmbledhur rëndësinë e këtyre proceseve.
Lajme
Maqedonasit bashkohen kundër shqipes në Butel, VLEN dhe AKI përgjigjen me bojkot të seancës
Këshilltarët shqiptarë nga AKI dhe VLEN në Komunën e Butelit kanë braktisur sot seancën e Këshillit Komunal, në shenjë proteste ndaj mosmiratimit të propozimit që tabela informuese e Mega Parkut të përmbajë edhe mbishkrimin në gjuhën shqipe.
Nisma u paraqit nga këshilltarët e AKI-së dhe mori mbështetjen e përfaqësuesve të VLEN-it. Në votim, tetë këshilltarët shqiptarë votuan në favor të propozimit, ndërsa 11 këshilltarët e tjerë abstenuan. Si pasojë, propozimi nuk arriti të sigurojë shumicën e nevojshme.
Pas rezultatit të votimit, këshilltarët e AKI-së u larguan nga seanca, ndërsa në shenjë solidariteti me ta, të njëjtin veprim e ndërmorën edhe këshilltarët e VLEN-it.
Çështja shkaktoi debat dhe tensione gjatë mbledhjes, ndërsa reagimet lidhur me këtë rast u pasqyruan edhe në rrjetet sociale.
Këshilltarja e AKI-së në Butel, Senka Nuhiu-Qafleshi, theksoi se kërkesa e përfaqësuesve shqiptarë është e qartë dhe lidhet me respektimin e statusit zyrtar të gjuhës shqipe në këtë komunë.
“Qëndrimi i këshilltarëve shqiptarë në Komunën e Butelit mbetet i qartë: gjuha shqipe të respektohet dhe të përdoret zyrtarisht në Komunën e Butelit, në përputhje me Kushtetutën dhe ligjet në fuqi”, deklaroi Nuhiu-Qafleshi.
Debati për përdorimin e gjuhës shqipe u rikthye pas vërejtjeve për mungesën e saj në tabelën informuese të Mega Parkut të ri në Butel, hapësirë e promovuar nga Qyteti i Shkupit dhe Komuna e Butelit.
Ndërkohë, institucionet përkatëse nuk kanë dhënë sqarime konkrete lidhur me arsyet e mungesës së mbishkrimit në shqip. Nga Ndërmarrja Publike “Parqe dhe Gjelbërime” më herët kishin deklaruar se vendosja e tabelave nuk është në kompetencën e tyre.
Sipas të dhënave të regjistrimit të popullsisë të vitit 2021, në Komunën e Butelit jetojnë 14.095 shqiptarë nga gjithsej 37.968 banorë, që përbëjnë rreth 37 për qind të popullsisë rezidente.
Ligji për Përdorimin e Gjuhëve parasheh që në komunat ku së paku 20 për qind e qytetarëve flasin një gjuhë tjetër nga maqedonishtja, ajo gjuhë dhe alfabeti i saj të jenë në përdorim zyrtar krahas gjuhës maqedonase.
Rasti në Butel rikthen në vëmendje çështjen e zbatimit të të drejtave gjuhësore në institucionet publike. Në raste të mëparshme të ngjashme, institucionet janë arsyetuar se mungesa e shqipes ka ardhur si pasojë e lëshimeve teknike, të cilat kanë premtuar se do të korrigjohen.
-
Lajme12 months agoZbulohet Identiteti i Personit Të Vrarë Në Tetovë
-
Lajme2 years agoDetaje nga ngjarja tronditëse në Tetovë: Burri vrau gruan dhe vajzën 4 vjeçe, pastaj qëlloi djalin 9 vjeç dhe veten e tij
-
Lifestyle3 years agoTrashet miqësia me maqedonë në familjen e Adelina Tahirit
-
Lajme2 years agoKëto ministri dhe poste zv ministrash do ti takojnë VLEN-it
-
Lajme12 months agoAplikacion që zbulon kamerat radar, shoferët e shkarkojnë masivisht
-
Lajme3 years agoJa kush janë 13 deputetët e koalicionit “VLEN” (Lista)
-
Lajme3 years agoBurrin e Shkurte Fejzës e godet vetura (PAMJE)
-
Lajme1 month agoÇmimi i naftës shënon rënie
