Lajme
Çfarë posedon Gruevski dhe sa fitime realizon ai në Hungari?
Kompania hungareze e ish-kryeministrit të Maqedonisë, Nikolla Gruevski edhe nën sanksionet e SHBA-ve arrin të fitojë dhjetëra mijëra euro në vit nga shërbimet e konsulencës, tregojnë të dhënat nga regjistri i kompanive hungareze, shkruan Kolegium.mk, njofton Portalb.mk.
Se kompania po operon në mënyrë të qëndrueshme me hyrje të rregullta tregon raporti i fundit i publikuar mbi llogarinë përfundimtare për vitin 2024. Regjistri i kompanive hungareze do t’i publikojë të dhënat nga llogaritë përfundimtare për vitin 2025 në muajin maj.
“Miku i mirë i ish-kryeministrit hungarez Viktor Orbán nga Maqedonia, Gruevski, një i dënuar që u arratis në Hungari në vitin 2018 dhe mori statusin e azilit, në verën e vitit 2021 vendosi ta themelojë kompaninë e tij të vogël në qytetin e vogël hungarez në rajonin e Pest, Pecs”, shkruan portali investigativ hungarez 444.hu.
Bëhet fjalë për kompaninë ICIC Kft., aktiviteti kryesor i së cilës janë shërbimet e konsulencës, e cila mbledh në bilancin e saj bankar me miliona forinta hungareze. Në njoftimin e “Open sanctions” qëndrojnë disa variacione të emrit të kompanisë, përfshirë këtu edhe ICIC LTD, e cila, përveç konsulencës, ka ofruar edhe shitje me shumicë të porcelanit, qelqit, produkteve për pastrim dhe organizim eventesh.
“Ai mund të ketë një klient fiks, sepse të ardhurat kanë ardhur në vitet e fundit, ndërsa vetë aktiviteti nuk është aspak me shpenzime intensive, prandaj ai mund të realizojë edhe një fitim të madh”, thuhet në lajmin e medias hungareze.
Në vitin 2024 ish-kryeministri i Maqedonisë ka fituar mbi 4 milionë forinta, ose rreth 11 mijë euro, ndryshe nga një vit më parë kur ka fituar 9.700 euro. Sipas të dhënave që i ka deklaruar, ai ka pasur shpenzime të vogla për kompaninë në vlerë prej 3.400 euro, që do të thotë se i kanë mbetur rreth shtatë mijë euro fitim. Nga këto, ai ka marrë 5 mijë euro si dividendë, kështu që gjatë 3 viteve të funksionimit të kompanisë shuma e përgjithshme e ish-kryeministrit ka arrirë në 16,7 milionë forinta, ose 45 mijë euro, shkruan 444.hu.
Raporti gjithashtu zbulon se edhe pse Nikolla Gruevski i ka tërhequr rregullisht pjesën më të madhe të fitimeve të kompanisë, në fund të vitit të kaluar në llogarinë bankare të kompanisë ka pasur rreth 8 milionë forinta.
“Por, një zhvillim krejtësisht i papritur është se kryeministri i dënuar jo vetëm që jep këshilla, por edhe me sa duket mund të marrë edhe kredi. Ai ka shënuar një borxh prej 2,52 milionë forintash, ose gjashtë mijë eurosh, në bilancin e tij”, thuhet në hulumtim.
Shërbimet e konsulencës së Gruevskit në Budapest i ka përdorur edhe ministri aktual i punëve të jashtme, Péter Szijjártó, i cili, sipas raportimeve të mediave hungareze, e ka pritur ish-kryeministrin e Maqedonisë në zyrën e tij dhe është konsultuar me të për çështje që kanë të bëjnë me Ballkanin Perëndimor. Sipas ministrit, Gruevski është ai nga i cili mund të marrë informacionin më të besueshëm për rajonin, pasi ka qenë kryeministër 10 vjet.
“Nëse duam të marrim informacionin më autentik rreth asaj që po ndodh në Ballkanin Perëndimor, si po zhvillohen proceset në Ballkanin Perëndimor, atëherë me kë do të flisnim nëse jo me një person që ka qenë kryeministër atje për 10 vjet? Dhe po, bisedojmë me të rregullisht. Nuk ka rëndësi se ku. Për shembull, unë bisedoj me të në zyrën time në Ministri. Dhe mendoj se është e natyrshme që zyrtarët e Ministrisë së Punëve të Jashtme të jenë në kontakt me një person që ka qenë kryeministër i vendit të tij për 10 vjet”, tha Szijjártó në parlamentin hungarez pas kritikave për takimet e tij me Gruevskin.
Për shkak të mënyrës së qeverisjes së tij Gruevski u gjend në listën e zezë në prill të vitit 2022. Arsyeja ishte aktgjykimi kundër tij dhe akuzat për raste të shumta korrupsioni, si dhe për shpërdorim të detyrës zyrtare, pastrim parash dhe krime të tjera që lidhen me kohën e tij si Kryeministër i Maqedonisë së Veriut nga viti 2006 deri në vitin 2016.
“Ai i është shmangur vazhdimisht arrestimit për dënimin e tij të vitit 2018 nga gjykata në Maqedoninë e Veriut për akuza që lidhen me korrupsionin, gjë që paraqet një goditje serioze ndaj përgjegjësisë për korrupsionin dhe aktivitetet që lidhen me korrupsionin në Maqedoninë e Veriut. Gruevski është pronar dhe drejtor i kompanisë hungareze I.C.I.C. KFT, e cila është e regjistruar si shoqëri me përgjegjësi të kufizuar në Hungari”, thuhej në njoftimin për sanksionet nga Departamentit i financave të SHBA-ve.
Sipas njoftimit në listën e zezë është futur edhe kompania e tij.
Ndërkohë, përkujtojnë mediat hungareze, atdheu i tij shiti një pjesë të pronës së konfiskuar. Shteti i sekuestroi apartamentet si pjesë e vendimit gjyqësor në rastin “Parcelat në Vodno”, për të cilin Gruevski u dënua në mungesë me 9 vjet burg, sepse, siç thuhet në vendim, ai përdori para nga donacionet e VMRO-DPMNE-së (mbi 1,3 milion euro) për të blerë pronë përmes një kompanie offshore.
Herën e fundit që Ministria e Drejtësisë e Maqedonisë ka kërkuar ekstradimin e Gruevskit ka qenë në vitin 2019, për të gjitha rastet kundër tij dhe për të cilat ishte lëshuar një urdhër arresti ndërkombëtar. Kjo në fakt ishte një plotësim i kërkesës së dërguar në vitin 2018.
Atëkohë autoritetet hungareze zyrtarisht e kanë njoftuar Maqedoninë se nuk do ta ekstradonin Gruevskin. Këtë vendim e mori Gjykata Supreme Rajonale me arsyetimin se nuk ishin përmbushur parakushtet ligjore për ekstradimin e Gruevskit, sepse me kërkesën e tij atij iu dha azil në Hungari dhe “në përputhje me Aktin nr. 38 për Ndihmën Juridike Ndërkombëtare në Çështjet Penale, një person të cilit i është dhënë azil nuk do të ekstradohet në vendin nga i cili është arratisur”.
Pas deklaratave të fundit të kryeministrit të ardhshëm hungarez Peter Magyar, i cili fitoi në zgjedhjet e 12 prillit, se nuk ka vend për kriminelë ndërkombëtarë në Hungari, Ministria e Drejtësisë e Maqedonisë njoftoi se kishte kërkuar informacion nga gjykatat në lidhje me Gruevskin, në mënyrë që të vazhdonte më tej.
Kryeministri aktual i Maqedonisë, Hristijan Mickoski, tha se nëse Gruevski kthehet në vend ai do të përfundojë në burg. Lidhur me ekstradimin e mundshëm, në deklaratën e tij të fundit kryeministri tha se i arratisuri fillimisht duhet ta humbasë statusin e azilantit në Hungari.
“Në rastin tonë, ish-kryeministri ka azil. Për të dërguar një kërkesë për ekstradim, duhet të ndiqet së pari një procedurë, për ta tërhequr statusin e azilantit. Kjo është gjëja e parë. Nëse e dërgojmë tani, do të marrim një përgjigje negative. Mund ta dërgojmë nesër, pa problem, por le t’i shohim gjërat në një mënyrë më substanciale”, tha Mickoski më 17 prill.
Gruevski u arratis në nëntor të vitit 2018, pak para datës kur duhej të hynte në burg për të vuajtur një dënim dyvjeçar me burg për rastin “Tanku” për blerjen e paligjshme të Mercedesit të blinduar. Ekzekutimi i këtij dënimi vjetërsohet në vitin 2024.
Për momentin kundër tij ka dy vendime të plotfuqishme. Njëri është dënimi i lartpërmendur me nëntë vjet për lëndën “Parcelat në Vodno”, i cili vjetërsohet në shkurt të vitit 2043, ndërsa i dyti për rastin “Dhuna në Qendër”, ku ai është dënuar me një vit e gjysmë, e që vjetërsohet në shtator të vitit 2027.
Raste aktuale gjyqësore në të cilat po gjykohet Gruevski në mungesë janë “Titaniku” për parregullsi zgjedhore dhe “Talir 2” për ndërtimin e paligjshëm të selisë së VMRO-DPMNE-së.
Lajme
Në ditën e parë u shitën mbi 24.5 milionë kopje të GTA 6, 2.36 miliardë dollarë të ardhura
Pas 13 vitesh pritje, videoloja e shumëpritur Grand Theft Auto 6 (GTA 6) ka debutuar me një sukses të jashtëzakonshëm tregtar. E publikuar më 19 nëntor, loja ka arritur të kthehet brenda pak orësh në një nga lançimet më të mëdha në historinë e industrisë së argëtimit.
Sipas vlerësimeve paraprake të kompanisë analitike Sensor Tower, shitjet e GTA 6, duke përfshirë edhe porositë paraprake, kanë kaluar 24.5 milionë kopje. Të ardhurat vlerësohen në rreth 2.36 miliardë dollarë.
Nëse këto shifra konfirmohen, GTA 6 do të regjistrojë një nga debutimet më të mëdha tregtare të të gjitha kohërave. Kompania mëmë Take-Two Interactive dhe zhvilluesi Rockstar Games nuk kanë publikuar ende shifra zyrtare të shitjeve, por e kanë përshkruar kërkesën për lojën si të paprecedentë.
Sipas agjencisë Reuters, vlerësimet e Sensor Tower tregojnë se GTA 6 ka shitur pothuajse trefishin e kopjeve që kishte shitur paraardhësi i tij, GTA 5, gjatë 24 orëve të para të publikimit në vitin 2013.
Të ardhura sa një superprodhim hollivudian
Përmasat e suksesit bëhen edhe më të dukshme kur krahasohen me industrinë e filmit. Sipas të dhënave të cituara në raport, filmi Spider-Man: Brand New Day ka grumbulluar rreth 2.5 miliardë dollarë nga shitja e biletave në kinematë botërore.
GTA 6 ka arritur t’i afrohet kësaj shifre që në ditën e parë të publikimit, duke përfshirë edhe porositë paraprake.
Ndërkohë, kompania kërkimore e tregut Niko Partners parashikon se të ardhurat nga loja mund të kalojnë 3 miliardë dollarë deri në fund të vitit 2026.
Miliona lojtarë në pritje, rekord edhe në trafikun e internetit
Publikimi i GTA 6 ka shkaktuar një mobilizim të jashtëzakonshëm të lojtarëve në mbarë botën. Shumë prej tyre kanë qëndruar zgjuar gjatë natës për të nisur menjëherë aventurën e re, ndërsa të tjerë kanë planifikuar të marrin pushim nga puna për t’i kushtuar më shumë kohë lojës.
Interesi masiv është reflektuar edhe në trafikun e internetit. Në Britaninë e Madhe, operatori Virgin Media O2 ka regjistruar nivele rekord të transferimit të të dhënave, për shkak të shkarkimeve dhe instalimeve paraprake të lojës.
GTA 6 zë rreth 212 GB hapësirë, çka kërkon një sasi të konsiderueshme të dhënash për shkarkim dhe instalim.
Një nga videolojërat më të shtrenjta në histori
Pas këtij projekti qëndron një investim gjigant. Kostoja e zhvillimit të GTA 6 vlerësohet të ketë kaluar 1 miliard dollarë, shifër që, nëse konfirmohet, do ta rendiste atë ndër videolojërat më të shtrenjta të prodhuara ndonjëherë.
Rockstar Games ka punuar për më shumë se një dekadë për të sjellë pasardhësin e GTA 5, i cili u publikua në vitin 2013 dhe u shndërrua në një prej lojërave më të suksesshme komerciale të të gjitha kohërave.
Ngjarjet e lojës zhvillohen në Leonida, një shtet imagjinar i frymëzuar nga Florida, ndërsa qendra kryesore e historisë është Vice City, e ndërtuar mbi modelin e Majamit.
Protagonistët janë Lucia dhe partneri i saj Jason, dy personazhe të përfshirë në botën e krimit, grabitjeve dhe ndjekjeve të rrezikshme. Loja ndërthur aksionin me satirën sociale, duke trajtuar kulturën amerikane dhe anën e errët të ëndrrës amerikane.
Rockstar ka ende dy burime të mëdha të ardhurash
Pavarësisht suksesit të jashtëzakonshëm të ditëve të para, potenciali tregtar i GTA 6 mund të rritet edhe më tej.
Për momentin, loja është e disponueshme për PlayStation 5 dhe Xbox Series X|S. Ende nuk është njoftuar një datë zyrtare për versionin e kompjuterëve, ndërsa pritet edhe prezantimi i modalitetit online, ku lojtarët do të mund të ndërveprojnë dhe të zhvillojnë misione së bashku përmes internetit.
Përvoja e GTA 5 tregon rëndësinë që mund të ketë kjo pjesë e lojës. GTA Online u shndërrua në një burim të rëndësishëm të ardhurash për kompaninë, përmes blerjeve virtuale, automjeteve luksoze, pronave dhe përmbajtjeve të tjera shtesë.
Kufizime në disa tregje
Përmbajtja e lojës, e cila përfshin skena të dhunshme dhe materiale të destinuara për të rritur, ka sjellë edhe kufizime në disa tregje ndërkombëtare.
Në Japoni janë raportuar ndërhyrje për përshtatjen e përmbajtjes me rregullat vendase, ndërsa në Kinën kontinentale loja nuk ka marrë miratimin për shitje zyrtare.
Megjithatë, këto kufizime nuk duket se kanë ndikuar në interesin e jashtëzakonshëm global.
Me më shumë se 24.5 milionë kopje të shitura sipas vlerësimeve paraprake dhe të ardhura që kapin rreth 2.36 miliardë dollarë, GTA 6 po vendos një standard të ri për industrinë e videolojërave. Për Rockstar Games, debutimi i 19 nëntorit mund të jetë vetëm fillimi i një suksesi që pritet të vazhdojë edhe në vitet e ardhshme.
Lajme
Era e fuqishme në Tetovë dhe Pollog! Rreth 15 intervenime, pa të lënduar
Erërat e fuqishme që përfshinë mbrëmë Tetovën dhe rajonin e Pollogut shkaktuan dëme të shumta materiale. Pemë të rrëzuara, kulme të dëmtuara, rrugë të bllokuara dhe ndërprerje të energjisë elektrike në disa vendbanime. Ekipet e zjarrfikësve intervenuan në rreth 15 raste, ndërsa në terren gjatë gjithë natës ishin edhe ekipet e ndërmarrjes publike komunale për largimin e pemëve dhe degëve të rrëzuara.
“Patëm rreth 15 intervenime, dy zjarre, disa kulme të rrëzuara, rrugë të bllokuara, si dhe shtylla elektrike të dëmtuara. Kemi intervenuar në të gjitha rastet dhe situatën e kemi pasur nën kontroll. Fatmirësisht, nuk kemi persona të lënduar”, deklaroi Avni Ameti, shef i NjTKZ Tetovë.
Komuna e Tetovës u ka bërë apel qytetarëve që të kenë kujdes gjatë motit të lig dhe të shmangin lëvizjet e panevojshme. Deri më tani, në Komunë nuk është paraqitur asnjë kërkesë zyrtare për kompensimin apo evidentimin e dëmeve.
“Komuna e Tetovës mbrëmë doli me apel për qytetarët që të kenë kujdes dhe të shmangin lëvizjet gjatë erërave të fuqishme. Deri më tani nuk kemi pasur denoncime nga banorët për dëmet materiale, por nëse paraqiten raste të tilla, Komuna së bashku me inspektoratin do të dalë në terren për verifikimin e tyre dhe marrjen e masave të nevojshme”, deklaroi Besarta Ramadani, zëdhënëse e Komunës së Tetovës.
Në polici është raportuar edhe dëmtimi i një automjeti nga tjegullat e një kulmi në rrugën industriale. Ekipet e SPB Tetovë, zjarrfikësit dhe ndërmarrja publike komunale kanë bashkëpunuar për sigurimin dhe pastrimin e rrugëve. Deri më tani, as në Qendrën për Menaxhim me Kriza nuk janë raportuar dëme më të mëdha materiale. Fatmirësisht, nga të gjitha incidentet nuk ka persona të lënduar.
Lajme
Imer Aliu: PPD, BDI dhe VLEN – emra të ndryshëm, e njëjta filozofi politike!
35 vite pluralizëm, emra të rinj partish, por e njëjta formulë politike: kompromiset për pushtet në kurriz të interesave të shqiptarëve. Kështu e përshkruan përfaqësimin politik shqiptar në Maqedoninë e Veriut, Imer Aliu, përfaqësues i lartë i PDSH-së.
Sipas Aliut, nga PPD-ja te BDI-ja dhe VLEN-i, partitë kanë ndryshuar emrat, por jo filozofinë politike, duke e vendosur qëndrimin në pushtet mbi interesat e shqiptarëve.
Ai thekson se PDSH-ja ka përfaqësuar një koncept tjetër, të bazuar në dinjitetin kombëtar, barazinë politike dhe refuzimin e nënshtrimit për interesa pushteti.
“Sa herë duhet të ndryshojnë emrat e partive që më në fund të kuptoni se po votoni për të njëjtin model politik?”, pyet Aliu.
-
Lajme12 months agoZbulohet Identiteti i Personit Të Vrarë Në Tetovë
-
Lajme2 years agoDetaje nga ngjarja tronditëse në Tetovë: Burri vrau gruan dhe vajzën 4 vjeçe, pastaj qëlloi djalin 9 vjeç dhe veten e tij
-
Lifestyle3 years agoTrashet miqësia me maqedonë në familjen e Adelina Tahirit
-
Lajme3 years agoKëto ministri dhe poste zv ministrash do ti takojnë VLEN-it
-
Lajme12 months agoAplikacion që zbulon kamerat radar, shoferët e shkarkojnë masivisht
-
Lajme3 years agoJa kush janë 13 deputetët e koalicionit “VLEN” (Lista)
-
Lajme3 years agoBurrin e Shkurte Fejzës e godet vetura (PAMJE)
-
Lajme1 month agoÇmimi i naftës shënon rënie
