Lajme

Dauti: VLEN dhe BDI po bashkëpunojnë për t’i bërë hyzmetin VMRO-së

Deputetja e Lidhjes Shqiptare, Ilire Dauti, ka akuzuar VLEN-in dhe BDI-në se, sipas saj, me veprimet e tyre po i shërbejnë VMRO-DPMNE-së në procesin e miratimit të Kodit të ri Zgjedhor.

Ajo pretendon se ndryshimet e propozuara do t’ua pamundësojnë shqiptarëve të diasporës votimin elektronik ose me postë edhe në zgjedhjet lokale, duke ndikuar drejtpërdrejt në rezultatet zgjedhore në disa komuna me shumicë shqiptare.

Në një reagim publik, Dauti iu drejtua qytetarëve shqiptarë duke vlerësuar se dy blloqet politike shqiptare, ndonëse në pozita të ndryshme, po veprojnë në favor të VMRO-DPMNE-së.

“Shqiptarë të dashur, VLEN dhe BDI po bashkëpunojnë, secili në mënyrën e vet, për t’i bërë hyzmetin VMRO-së”, deklaroi Dauti.

Sipas saj, kjo është dëshmuar së fundmi me nënshkrimin e Kodit të ri Zgjedhor të propozuar nga VMRO-DPMNE, për të cilin ajo thotë se përjashton diasporën nga mundësia e votimit elektronik ose me postë edhe në zgjedhjet lokale.

“Së fundmi, kjo u pa edhe me nënshkrimin e Kodit të ri Zgjedhor të propozuar nga VMRO, me të cilin diasporës po i ndalohet votimi elektronik ose me postë edhe për zgjedhjet lokale. Me këtë përjashtim, ata po ia mundësojnë VMRO-së fitoret e ardhshme në Kërçovë, Bërvenicë dhe Butel”, u shpreh deputetja.

Dauti komentoi edhe deklaratat e fundit të përfaqësuesve të VLEN-it, të cilët, sipas saj, kanë shprehur pendesë për mbështetjen e dhënë.

“Kujdes: Sot thonë se ‘janë bërë pishman’. Por nëse LSDM dhe Levica i tërheqin amendamentet e tyre, si do ta bllokojnë këta Komisionin kur afati ka kaluar?”, pyeti ajo.

Deputetja e Lidhjes Shqiptare vlerëson se zgjidhja e vetme do të ishte mbështetja e amendamenteve të paraqitura nga partia e saj, të cilat, sipas saj, synojnë të pengojnë miratimin e dispozitave që kufizojnë të drejtën e votës së diasporës.

“Më korrekte do të ishte ta pranojnë gabimin dhe t’u bashkohen amendamenteve të Lidhjes Shqiptare, të cilat janë dorëzuar pikërisht për të bllokuar këtë Kod që e përjashton mërgatën nga votimi elektronik apo me postë edhe në zgjedhjet lokale”, theksoi Dauti.

Në fund të reagimit, ajo deklaroi se, sipas saj, veprimet e subjekteve politike shqiptare në këtë proces përbëjnë dëm për interesat e shqiptarëve dhe duhet të denoncohen publikisht.

Lajme

Rragon Adnan Azizi: Nuk na ka trembur asnjë pushtet, Shqipëria është e shqiptarëve

Deputeti i VLEN, Adnan Azizi, ka reaguar publikisht pas lajmit se ishte ndaluar nga autoritetet shqiptare në pikën kufitare të Qafë Thanës, raporton Zyrtare.

Përmes një postimi në rrjetet sociale, Azizi falënderoi të gjithë ata që i kanë dërguar mesazhe mbështetjeje, duke theksuar se gjatë angazhimit të tij politik nuk është zmbrapsur nga asnjë pushtet.

“Në gjithë ato vite veprimi politik, nuk na ka trembur e zbrapsur asnjë pushtet e asnjë tiran. Aq më pak këta të Open Ballkanit”, shkroi ai.

Deputeti i VLEN-it theksoi se Shqipëria nuk është pronë e askujt dhe se u përket të gjithë shqiptarëve, pavarësisht se kush është në pushtet në Tiranë.

“Shqipëria nuk është pronë e askujt. Ajo është po aq e jona sa e çdo shqiptari, pavarësisht se kush qeveris në Tiranë. Pushtetet janë të përkohshme. Shqipëria është e përhershme. Shqipëria mbetet gjithmonë e shqiptarëve!”, përfundon reagimi i Azizit.

Reagimi vjen pasi më herët u raportua se deputeti i VLEN-it ishte ndaluar në pikën kufitare të Qafë Thanës nga autoritetet shqiptare. Ende nuk ka një sqarim zyrtar nga autoritetet shqiptare lidhur me arsyet e ndalimit.

Lajme

Qoku, Azizi dhe Murtezani përballen me ndalesë për hyrje në Shqipëri

Disa zyrtarë nga Maqedonia e Veriut janë përballur me ndalesë për hyrje në Shqipëri, raporton TV21.

Bëhet fjalë për koordinatorin e grupit parlamentar të VLEN-it, deputetin Bekim Qoku, deputetin Adnan Azizi dhe Hasim Murtezanin, zëvendëssekretar i përgjithshëm në Qeverinë e Maqedonisë së Veriut.

Sipas tyre, ngjarja ka ndodhur sot në pikën kufitare Qafë Thanë, ku ata tentuan të kalojnë kufirin me pasaporta diplomatike. Zyrtarët pretendojnë se janë mbajtur për rreth një orë në pritje, pa marrë sqarime.

Pas një ore, një pjesëtar i policisë kufitare u ka bërë të ditur se tre prej tyre mund të vazhdojnë udhëtimin, ndërsa personi i katërt që ishte me ta nuk lejohej të kalonte. Në shenjë revolte, ata vendosën të kthehen, ndërsa më pas, sipas deklarimeve të tyre, u është komunikuar se kanë ndalesë hyrjeje në Shqipëri.Sipas burimeve tona, kjo vjen pasi të njëjtit dyshohet se kanë qenë të përfshirë në organizimin e protestave në Tiranë, respektivisht dyshohet se ishin angazhuar në të ashtuquajturin “Revolucioni Flamingo”.
Kujtojmë se “Revolucioni Flamingo” është një lëvizja qytetare në Shqipëri, e cila nisi në fund të majit 2026 si protestë kundër ndërhyrjeve në zonën e mbrojtur të Laguna e Nartës, Zvërnec dhe projekteve të zhvillimit në Ishulli i Sazanit, por më pas u shndërrua në një lëvizje më të gjerë kundër qeverisë së kryeministrit të Shqipërisë, Edi Rama.

Lajme

Shqiptari që këshillon Erdoganin pozon krah Trumpit në Ankara

Sabri Demiri, shqiptari që është këshilltar i presidentit turk, Rexhep Tayyip Erdogan, është takuar në Ankara me presidentin e Shteteve të Bashkuara të Amerikës, Donald Trump.

Ai ka ndarë në rrjetet sociale një fotografi me liderin më të fuqishëm të botës.

Kjo fotografi është shkrepur para Pallatit Presidencial në Ankara.

Ndryshe, Trump po merr pjesë në samitin e NATO-s që po mbahet në kryeqytetin turk dhe ka pasur një takim të ngrohtë me liderin e Turqisë, Erdogan. /Klankosova.tv