Vetëm edhe një ditë ka mbetur deri në momentin kur Gjykata Speciale në Hagë pritet të bëjë publik vendimin për ish-drejtuesit e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.

Procesi gjyqësor ndaj tyre ka zgjatur për afro gjashtë vjet. Të katër ish-krerët e UÇK-së përballen me akuza për krime lufte dhe krime kundër njerëzimit, ndërsa gjatë gjithë procesit kanë deklaruar se nuk janë fajtorë për akuzat e ngritura ndaj tyre.

Ndërkohë, në prag të shpalljes së aktgjykimit, platforma “Liria ka Emër” ka bërë të ditur se sonte në Hagë do të mbahet një tubim paqësor i quajtur “Nata e pritjes”.
Tubimi do të zhvillohet para shpalljes së vendimit të Gjykatës Speciale.

“Çmimet po rriten, pagat nuk po përballojnë rritjen e çmimeve dhe familjet po jetojnë gjithnjë e më vështirë çdo muaj. Mickoski ka miliona euro për spektakle, tendera dhe luks, por ofron thërrima për qytetarët”, thonë nga partia opozitare maqedonase LSDM.
“Në kushte kur çmimet e karburanteve kanë tejkaluar 100 denarë për litër, dhe çmimet e ushqimeve po rriten çdo ditë, qeveria e mashtruesit Mickoski ka miratuar masa të vonuara, gjysmë të gatshme pa asnjë efekt në buxhetet familjare”.
LSDM ofron masa specifike për, siç thonë ata, një ulje reale të çmimeve.
“Heqje e plotë e akcizës për karburantet. Ulje e TVSH-së nga 18 në 5 përqind. Me masat e LSDM-së, një qytetar me një pagë mesatare do të jetë në gjendje të blejë deri në 205 litra benzinë më shumë sesa me masat e propozuara nga Qeveria. Kjo është ndihmë konkrete që do të ndihet menjëherë në çdo familje”, thonë nga LSDM.
Partia vlerëson se ulja e ndjeshme e çmimeve të karburanteve do të ulë edhe kostot e transportit dhe do të krijojë kushte për uljen e çmimeve të ushqimit dhe produkteve të tjera bazë.

Kryetari i Lidhjes Shqiptare, Ziadin Sela, në emisionin Click Plus në TV21 tha se partia e tij po përgatitet të garojë e vetme në zgjedhjet e ardhshme.

Sela tha se përvoja me koalicionet e deritanishme ka qenë zhgënjyese, duke theksuar se “të gjitha koalicionet na kanë lënë në mes të rrugës”.

Ai shtoi se LSH-ja po punon për të dalë e vetme para elektoratit dhe do të kërkojë mbështetjen e qytetarëve pa u varur nga koalicionet.

Mes tjerash theksoi se si parti politike synojnë që të dalin forca e parë politike në kampin shqiptar.