Lajme

Gjyla Çeliku tërhiqet nga politika: Nuk bëhem vegla e askujt sepse nuk dua të kontrollohem nga askush

Kryetarja e LQE-së Gjyla Çeliku ka vendosur të tërhiqet nga politika, Në një publikim në facebook Çeliku ka shkruar se ajo nuk pranon të bëhet vegla e askujt sepse nuk dëshiron të kontrollohet nga askush, informon portal “tetova1”.

“Vjen një moment në jetë kur e kupton se tërheqja nga politika dhe aktivitetet qytetare nuk është dobësi, por vetëdije. Nuk është humbje, por zgjedhje për të mbrojtur paqen dhe vlerat e tua. Kam pasur nderin dhe përgjegjësinë të jem gruaja e parë shqiptare në Maqedoninë e Veriut që ka udhëhequr një parti politike. Kam ngritur zërin kur edhe burrat heshtnin. Kam protestuar kokën lart kur të tjerët trembeshin dy fjalë të shkruajnë. Kam protestuar kundër EVN-së dhe rrymës me çmime të larta jo një ditë, por me javë të tëra. Sot jo, sepse populli nuk bashkangjitej, i konvenonte të bërtasë në rrjete sociale me profilë fallco dhe trembej nga mejdani
Një rrugë e vështirë, me shumë sakrifica, besim dhe përballje. E kam bërë me bindje, me guxim dhe me shpresën se ndryshimi është i mundur.
Edhe sot, ofertat nga parti të ndryshme vazhdojnë. I vlerësoj, por kam zgjedhur të mos i pranoj. Jo sepse nuk mundem, por sepse nuk dua të jem pjesë e një realiteti që nuk përputhet më me ndërgjegjen time.
Dashuria për vendin nuk matet gjithmonë me pozita apo poste. Ndonjëherë ajo shprehet edhe duke ditur kur të ndalesh, për të mos humbur veten dhe për të ruajtur dinjitetin.
Kjo është zgjedhja ime. E qetë, e menduar dhe e sinqertë.
Sepse pjekuria e vërtetë është të qëndrosh besnike ndaj vetes, edhe kur rruga tjetër duket më e lehtë.
Faleminderit të gjithë bashkëpunëtorëve të mi, popullit që më ka përkrahur dhe të gjithë atyre që nuk janë trembur nga e vërteta dhe e drejta.
Kam profesionin tim akademik që e bëj me shumë dashuri, si nëna për fëmijë, studentët e mi.
Nuk është koha për mua aty ku dëshironi ju dhe si dëshironi ju. Të isha pajtuar me politikbërjen tuaj nuk do krijoja parti politike, ndaj as atëherë dhe as tash nuk bëhem vegla e askujt sepse nuk dua të kontrollohem nga askush. Unë jam unë dhe ju të tjerët jeni ju, secili në rrugën e vete…
Me shumë respekt,
Doc.Dr. Gjyla Çeliku “, përfundon publikimi I saj.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.