Lajme

Nga telefonatat tek interneti, qytetarët po ndryshojnë mënyrën e komunikimit

Tregu i komunikimeve elektronike në Maqedoninë e Veriut gjatë vitit 2025 pasqyron një fazë të qartë maturimi dhe transformimi, ku përdoruesit vazhdojnë të mbështeten fuqishëm në shërbimet mobile, por njëkohësisht po ndryshojnë mënyrën se si i përdorin ato. Sipas të dhënave më të fundit, gjatë vitit të kaluar abonentët e telefonisë celulare realizuan mesatarisht 104.05 thirrje dhe folën rreth 228.03 minuta në muaj. Këto shifra tregojnë se komunikimi zanor vazhdon të ketë një rol të rëndësishëm, megjithëse trendet globale sugjerojnë një zhvendosje graduale drejt komunikimit përmes internetit, përfshirë aplikacionet e mesazheve dhe thirrjeve online.

Struktura e trafikut tregon një dominim të fortë të komunikimit brenda të njëjtit rrjet celular, me 143.27 minuta ose 62.83 për qind të totalit. Ky fenomen lidhet kryesisht me ofertat komerciale të operatorëve, të cilat favorizojnë thirrjet brenda rrjetit të tyre. Nga ana tjetër, trafiku drejt rrjeteve të tjera celulare në vend arrin në 80.99 minuta, ose 35.52 për qind, duke reflektuar një ndërveprim të konsiderueshëm mes përdoruesve të operatorëve të ndryshëm, por ende më të kufizuar krahasuar me komunikimin “on-net”.

Thirrjet drejt rrjeteve fikse dhe ato ndërkombëtare përbëjnë një pjesë shumë të vogël të përdorimit. Konkretisht, vetëm 1.51 minuta shkojnë drejt rrjetit fiks të të njëjtit operator, 1.97 minuta drejt rrjeteve të tjera fikse dhe vetëm 0.29 minuta drejt rrjeteve jashtë vendit. Kjo tregon një rënie të dukshme të rëndësisë së telefonisë fikse dhe të thirrjeve tradicionale ndërkombëtare, të cilat po zëvendësohen gjithnjë e më shumë nga shërbimet digjitale. Krahasuar me vitin 2024, vihet re një rënie e përgjithshme e volumit të trafikut drejt të gjitha destinacioneve. Ky zhvillim konsiderohet si tregues i qartë i ndryshimit të sjelljes së konsumatorëve, të cilët po orientohen gjithnjë e më shumë drejt përdorimit të internetit mobil për komunikim, në vend të thirrjeve klasike.

Numri i abonentëve aktivë të telefonisë mobile në fund të vitit 2025 arriti në 1.954.643, që paraqet një rritje prej 1.82 për qind krahasuar me vitin paraprak. Kjo rritje është nxitur kryesisht nga abonentët rezidencialë me kontratë (post-paid), të cilët shënuan një rritje prej 2.55 për qind. Në të kundërt, segmenti i biznesit ka pësuar një rënie të lehtë prej 0.3 për qind, që mund të lidhet me optimizimin e kostove dhe përdorimin më të madh të platformave alternative të komunikimit.

Sa i përket konkurrencës në treg, ajo mbetet relativisht e përqendruar. A1 MK kryeson me 48.08 për qind të pjesëmarrjes në treg, e ndjekur nga Makedonski Telekom me 45.93 për qind. Operatorët më të vegjël si MTEL (4.42 për qind), Telekabel (1.36 për qind), Mtelmobile (0.10 për qind) dhe Green Mobile (0.11 për qind) kanë një rol më të kufizuar, por gjithsesi kontribuojnë në diversifikimin e ofertës dhe rritjen e konkurrencës në treg. Në segmentin e telefonisë fikse, në fund të vitit u regjistruan 457.763 përdorues, që paraqet një rritje modeste prej 1.75 për qind. Megjithatë, funksioni i linjës fikse po ndryshon gradualisht, duke u integruar gjithnjë e më shumë në paketa të kombinuara shërbimesh.

Një tregues i rëndësishëm i këtij transformimi është numri i abonentëve në shërbime të paketuara, i cili arriti në 445.831. Shumica e këtyre përdoruesve zgjedhin paketa që përfshijnë tri shërbime – telefoninë fikse, internetin me brez të gjerë dhe televizionin – duke reflektuar një orientim të qartë drejt ofertave “bundle”, të cilat ofrojnë më shumë komoditet dhe kosto më të ulët për konsumatorët. Në përgjithësi, të dhënat tregojnë se tregu i komunikimeve në vend po kalon nga një model tradicional i bazuar në komunikimin zanor drejt një modeli gjithnjë e më digjital, ku interneti dhe shërbimet e integruara po marrin rolin dominues në jetën e përditshme të qytetarëve. /Koha/

Lajme

Lazim Destani feston ditëlindjen, urimi i të birit Blerim emocionon ndjekësit

“Urime ditëlindjen, babë i dashur!” – mesazhi i aktorit të njohur për të atin

Sot është një ditë e veçantë për familjen Destani. Biznesmeni dhe filantropi i njohur shqiptar, Lazim Destani, feston ditëlindjen, ndërsa në këtë ditë të veçantë nuk ka munguar urimi i të birit, aktorit me famë ndërkombëtare, Blerim Destani.

Me një mesazh të shkurtër, por plot dashuri e emocion, Blerimi ka zgjedhur rrjetet sociale për t’ia uruar ditëlindjen të atit.

“Urime ditëlindjen, babë i dashur!”, ka shkruar aktori, duke e shoqëruar urimin me një fotografi të ngrohtë përkrah të atit.

Një urim i thjeshtë në fjalë, por që përcjell shumë për marrëdhënien e veçantë mes babait dhe të birit.

Lazim Destani prej vitesh është një nga emrat e njohur të diasporës shqiptare, i vlerësuar për aktivitetin e tij në biznes, por edhe për kontributin në iniciativa humanitare, sociale dhe në mbështetje të komunitetit shqiptar.

Lajme

Vrasja në Ksamil, gjykata lë në burg Sokrat Vatën: Çfarë u vendos për të arrestuarit e tjerë

Gjykata e Sarandës ka caktuar masat e sigurisë për personat e arrestuar pas ngjarjes së rëndë në Ksamil, ku humbi jetën një turist portugez.

Për autorin e dyshuar të vrasjes, Sokrat Vatën është caktuar masa e sigurisë “arrest në burg”.
Po ashtu me masën e arrestit me burg janë lënë edhe dy shtetasit turq, Ezgi Parlak dhe Nuh Mahmutoglu.

Për Ildi Cekanin dhe Ardit Kasemin është caktuar arresti në burg për një afat 45-ditor.
Ndërkohë, për Luciano Seferin, Moisi Matushajn, Romeo Shehun dhe Kristo Koshon është vendosur masa “detyrim për t’u paraqitur në policinë gjyqësore”.

Lajme

VANDALIZËM NË MALIN SHARR: Dëmtohen shtyllat që orientonin alpinistët

Shtyllat e shenjëzimit dimëror për orientim të vizitorëve në Malin Sharr janë dëmtuar. Këta shtylla janë vendosur në shtegun nga Kodra e Diellit deri tek Maja e Titos. Sipas kryetarit të Komunës së Bogovinës Feti Abazi, mbi 45 nga 112 shtyllat e vendosura janë dëmtuar, shkatërruar ose larguar. “Ky është një dëm i madh për një projekt të realizuar me mbështetjen e Ambasadave të Austrisë, Republikës Çeke dhe Sllovakisë, me pjesëmarrjen e vullnetarëve dhe bizneseve lokale nga Komuna e Bogovinës dhe Tetovës. Turizmi malor është një potencial i jashtëzakonshëm për zhvillimin e Komunës së Bogovinës. Prandaj, çdo akt vandalizmi dëmton jo vetëm një investim, por edhe përpjekjet tona për ta zhvilluar dhe promovuar Malin Sharr si destinacion turistik”, shkruan në reagimin e tij kryetari i Komunës së Bogovinës Feti Abazi.

Ka reaguar edhe Ambasada e Austrisë. Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar. Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës. “Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.

Shënjimi i kësaj traseje, e gjatë rreth 11 kilometra, u vendos nga nëntori i vitit 2025 deri në fund të korrikut 2026, me pjesëmarrjen e më shumë se 25 vullnetarëve, të cilët investuan një angazhim të konsiderueshëm dhe orë pune në transportin dhe vendosjen e pajisjeve. Nga Parku Kombëtar “Mali Sharr” thonë se në kushtet e dimrit, shenjëzimi veror mbulohet nga bora, ndërsa në pjesë të caktuara shtegu dimëror devijon qëllimisht nga ai veror për shkak të rrezikut nga ortekët dhe rreziqeve të tjera. “Shtyllat janë të prodhuara për kushte të vështira malore dhe janë të shënuara me shenja shumë të dukshme me ngjyrë të kuqe dhe të verdhë, në mënyrë që të jenë të dallueshme edhe në borë, mjegull, gjatë natës dhe në kushte me dukshmëri të reduktuar. Kjo nuk është vetëm dëm material. Çdo shtyllë e hequr ose e shkatërruar nënkupton edhe humbjen e një pike orientimi, e cila në kushte të vështira dimërore mund të jetë vendimtare për sigurinë e alpinistëve”, thonë nga Parku Kombëtar “Mali Sharr”. Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.

Shoqatat malore theksojnë se ky nuk është vetëm dëm material. “Pas pajisjeve të shkatërruara qëndron diçka shumë më e rëndësishme, pra mundi i njerëzve që punuan që Mali Sharr të jetë më i sigurt dhe më mirë i përgatitur për alpinistët dhe vizitorë”, thuhet mes tjerash në reagimin e shoqatave malore. (koha.mk)