Sport

Shqipëria, “gjithçka ose asgjë”, kundër Ukrainës

Barazimi me Çekinë, ndonëse nuk e lejoi Kombëtaren tonë të parakalonte këtë rival, e ka mbajtur në lojë sidoqoftë për vendin e parë, edhe pse jo gjithçka varet nga kuqezinjtë.

Përfaqësuesja jonë duhet të mundë me patjetër Ukrainën të martën në mbrëmje në Tiranë dhe të shpresojë që dueli Çeki-Gjeorgji të mbyllet në barazim.

Në rast se në Pragë fiton Gjeorgjia, atëherë suksesi i Shqipërisë kundër Ukrainës duhet të jetë goxha i thellë në mënyrë që të jemi mbi gjeorgjianët me golavarazh.

Skenar i vështirë renditja në vendin e parë, edhe pse matematikisht i mundur. Fillimisht duhet të mendojmë të fitojmë vetë pasi sikurse ëndërrojmë vendin e parë, rrezikojmë të dalim edhe të fundit në rast se mundemi.

Silvinjo duhet të vazhdojë t’i bëjë llogarite me disazgjedhje të cunguara në disa reparte, sikurse të gjithë presin të guxojë pak më shumë me emra të tjerë.

Në sulm rikthehet nga pezullimi Mirlind Daku që do të jetë titullar në vendin të Indrit Tucit.

Shqetësimi më i madh i momentit është mungesa e Jasir Asanit që la fushën e lojës në pjesën e parë kundër Çekisë i zëvendësuar nga Taulant Seferi.

Nuk dihet nëse kundër Ukrainës do të jetë pikërisht Seferi që do të zëvendësojë Asanin, apo do të ketë alternative të tjera sikurse Ernest Muci apo Arbër Hoxha duke llogaritur ndoshta edhe ndonjë spostim të mundshëm të Nedim Bajramit.

Shqetësim i vogël edhe për Kristjan Asllanin që kundër Çekisë nuk ka luajtur në 100% të formës fizike.

Në rastin më ekstrem se ai do të nisë nga stoli, për Silvinjon do të ishte e nevojshme të bënte ndryshime themelore në mesfushë, pse jo me Bajramin për të luajtur disa metra përpara Ramadanit dhe Qazim Laçit.

Ndoshta diçka më shumë në lidhje me emra të veçantë do të tregojë edhe stërvitja e fundit sot në stadiumin kombëtar, ku trajneri Silvinjo pritet të skicojë edhe formacionin anti-Ukrainë.

Këtë kundërshtar e mundëm 2 me 1 me përmbysje në muajin shtator në ndeshjen e luajtur në Pragë falë golave të Ismajlit dhe Asanit. Ndeshja do të gjykohet nga portugezi Zhoao Pineiro./vizionplus.tv

Sport

Aulon Kurtishi, merr ftesë për herë të parë nga Maqedonia U15

Ekipi përfaqësues U15 i Maqedonisë së Veriut do të zhvillojë një kamp stërvitor në Kërçovë nga 9 dhjetor deri më 14 dhjetor të këtij viti.

Në mesin e të ftuarve të futbollistëve nga gjenerata 2010, ka marrë ftesë edhe talenti Aulon Kurtishi nga Shkëndija e Tetovës.

Lojtari që është pjesë e gjeneratës së drejtuar nga Ibrahim Luma te Shkëndija do të jetë pjesë e kësaj përfaqësuese për herë të parë.

Grumbullimi i Maqedonisë U15 të udhëhequr nga seleksionuesi Ilami Iseni është përcaktuar me 9 dhjetor nga ora 08:00 në Federatën e futbollit të Maqedonisë në Shkup.

Sport

Festë dhe spektakël në Tetovë, Shkëndija fiton duelin me Shkupin

Skuadra e Shkëndijës ka fituar me rezultat 2:0 derbin me Shkupin nën spektaklin e dy tifozerive “Ballistëve” dhe “Shvercerave” në Tetovë.

Në takimin e luajtur në kuadër të xhiros së 16-të në elitën e futbollit vendor, kuqezinjtë nga Tetova triumfuan me golat e Shalës dhe Ibraimit në minutat 4-t dhe 62-të.

Ky duel mori vëmendje të madhe për shkak se për herë të parë pas shumë vitesh kjo përballje u zhvillua nën praninë e dy tifozerive shqiptare.

Ndërkohë, në duelet tjera të luajtura në xhiro e 16-të, Struga Trim Lum mori fitore 1:0 ndaj Pelisterit, teksa Gostivari e mundi me rezultat 2:0 Vardarin.

Voska Sport ka humbur me rezultat 4:1 nga Sileksi në Kratovë, ndërsa Besa e Dobërdollit u mposht nga Brera Strumicë me shifrat 0:1. Fitore në këtë xhiro ka marrë Rabotniçki që triumfoi ndaj Tikveshit ke rezultat 0:2.

Sport

“Për vëllazëri s’ka kufij” Part II, Shkëndija bën falas hyrjen për “Shvercerat”

Pas nismës së suksesshme në ndeshjen e Kupës kundër Shkëndijës së Haraçinës, KF Shkëndija vazhdon me të njëjtën moto: “Për vëllazëri s’ka kufij”, tanimë si pjesë e dytë dhe vazhdimësi e duelit me vëllezërit shkupjan (haraçinali).
Të mërkurën, në përballjen e xhiros së 16-të të Ligës së Parë të Futbollit të Maqedonisë së Veriut, Shkëndija mirëpret FC Shkupin, duke hapur dyert e stadiumit për tifozët mysafir, Shvercerat, me hyrje falas.

Ky vendim, ashtu si në ndeshjen e kaluar, vjen si një mesazh i fuqishëm për promovimin e respektit, unitetit dhe solidaritetit ndërvëllazëror. Rivaliteti sportiv në fushë zgjat vetëm 90 minuta, ndërsa miqësia dhe vlerat që ndajnë këto dy klube duhet të jenë shembull për të gjithë.

Atmosfera pritet të jetë e jashtëzakonshme, me Ballistët dhe Shvercerat që do të shënojnë këtë ndeshje si një festë të vërtetë futbolli. KF Shkëndija vazhdon të tregojë se sporti është ura më e mirë që lidh komunitetet dhe inkurajon vlerat që i bëjnë njerëzit më të bashkuar.

Nën moton “Për vëllazëri s’ka kufij – Part II”, të mërkurën, Shkëndija dhe Shkupi takohen jo vetëm për një duel futbolli, por për të dhënë një mesazh të fuqishëm bashkimi dhe respekti, një ditë para festës së madhe kombëtare “28 Nëntorit”. /Sportmania/