Lajme

Fisnik Mela zyrtarisht merr detyrën e Kryetarit të Komunës së Dibrës

Sot, Fisnik Mela mori zyrtarisht detyrën e Kryetarit të Komunës së Dibrës, pas ceremonisë së pranim-dorëzimit të mandatit nga ish-kryetari Hekuran Duka.

Në fjalën e tij, Mela e cilësoi këtë moment si një përgjegjësi të madhe dhe një emocion të veçantë, duke theksuar se besimi i qytetarëve nuk është vetëm një mandat politik, por një detyrim moral për të punuar me ndershmëri dhe transparencë në shërbim të çdo banori të komunës.

“Kjo është një ditë e rëndësishme për Dibrën. Do të punojmë për institucione që dëgjojnë, që veprojnë dhe që sjellin zhvillim të vërtetë. Bashkë do ta ndërtojmë një komunë të mundësive dhe mirëqenies për të gjithë,” u shpreh Mela.

Në fund, ai uroi që Zoti ta bekojë Dibrën dhe qytetarët e saj.

Lajme

Ish Presidenti i Shqipërisë Rexhep Meidani nga sot “Honoris Causa” i UT-së

Ish-Presidenti i Republikës së Shqipërisë, Rexhep Meidani, është nderuar sot me titullin “Doctor Honoris Causa” nga Universiteti i Tetovës.

Ky vlerësim i jepet Meidanit për kontributin e tij të shquar në jetën akademike, shkencore dhe institucionale, si dhe për rolin e tij në forcimin e demokracisë, arsimit të lartë dhe mendimit intelektual në të gjithë trojet shqiptare veçanërisht në Maqedoni të Veriut.

Ceremonia e akordimit u zhvillua në ambientet e Universitetit të Tetovës, në prani të autoriteteve akademike, personaliteteve të jetës publike dhe përfaqësuesve të komunitetit universitar.

Me këtë titull, Universiteti i Tetovës vlerëson figurën dhe veprën e Rexhep Meidanit si një nga personalitetet më të rëndësishme të jetës akademike dhe politike shqiptare në dekadat e fundit.

Lajme

Zgjedhjet e 11 janarit në Gostivar, KSHZ përcakton renditjen e kandidatëve në fletëvotim

Në Komisionin Shtetëror të Zgjedhjeve (KSHZ) sot është hedhur shorti për përcaktimin e numrave rendorë në fletëvotim për zgjedhjet e përsëritura lokale që do të mbahen më 11 janar në Komunën e Gostivarit.

Sipas shortit, kandidati i koalicionit VLEN, Nevzat Bejta, do të garojë me numrin 1 në fletëvotim, ndërsa kandidati i Aleancës Kombëtare për Integrim (AKI), Valbon Limani, do të jetë i renditur me numrin 3.

“Sot më ra numri 3 si kandidat në garën për Kryetar Komune! Epo si thonë: E treta e vërteta. Votoni nr 3 e të gjithë bashkë të ndërtojmë Gostivarin!”, shkruan Limani.

“Numri 1 për Ne. Sot u hodh shorti në KSHZ për numrat rendorë në listat e votimit për zgjedhjet e 11 Janarit. Na ra numri 1. Jo rastësisht. Sepse numri 1 është shpresë, është besim, është fitore. Numri 1 për të gjithë ata që nuk u dorëzuan kurrë për Gostivarin. Numri 1 për ata që besojnë se qyteti ynë meriton më shumë, më mirë dhe më drejt. Me mbështetjen tuaj dhe me zemër të pastër, 11 Janari do të jetë dita kur Gostivari feston. I juaji”, shkruan Nevzat Bejta.

Zgjedhjet e 11 janarit zhvillohen pas vendimit për përsëritjen e procesit zgjedhor në Gostivar, ndërsa fushata pritet të vijojë sipas afateve të përcaktuara nga KSHZ.

Lajme

Limani për Bejtën: Po të mos ishte qesharake, rikandidimi i tij do të ishte tragjik

Në edicionin qendror të lajmeve në TV Alsat, kandidati për kryetar komune nga radhët e Aleancës Kombëtare për Integrim – BDI dhe ASH, Valbon Limani, u pyet për kandidaturën e Nevzat Bejtës nga koalicioni VLEN për Gostivarin në zgjedhjet e 11 janarit.

“Me gjithë respektin për Nevzat Bejtën, unë mendoj që po të mos ishte qesharake do të ishte tragjike rikandidimi i tij. Ai është një relikt politik, i cili kandidohet për të gjashtën herë, dhe kjo është një mesazh shumë i keq për qytetarët dhe veçmas për të rinjtë,” tha Limani.

Ai shtoi se koalicioni VLEN ka humbur mundësinë për të propozuar një kandidaturë serioze, duke përmendur edhe kandidatin e mëparshëm Sebajdin Dautin dhe të besuarin e qeverisë Fadil Xhelilin. “Por ja që i zhgënjyen ata dhe sërish kandiduan për të gjashtën herë zotri Bejtën. Besoj që qytetarët qartë do të flasin më 11 janar,” theksoi Limani.

Limani u pyet edhe për akuzat e Bejtës, lidhur me borxhet e trashëguara nga qeverisja e Arben Taravarit, si dhe për shtimin e borxhit gjatë mandatit të tij. “Nuk do të komentoj akuzat e Bejtës, sepse për atë flet vet ai, dhe gjithë këto 23 vjet të aktivitetit të tij politik, qytetarët e dinë shumë mirë se çka dhe sa vlejnë fjalët e tij,” tha Limani.