Lajme

Nëse paguani gjobën brenda 8 ditëve, do ta paguani vetëm gjysmën, pritet zgjerim i shkeljeve që do të regjistrojë sistemi “Safe City”

Gjoba dhe sanksione të tjera janë parashikuar për shkeljet e trafikut që do të evidentohen përmes sistemit “Qytet i Sigurt”, i cili nga dje ka filluar të funksionojë në fazë provuese në Shkup. Njoftimet për shkeljet e kryera qytetarët do t’i marrin përmes SMS porosive në telefonin mobil dhe në adresën elektronike, ndërsa afati për pagesë është tetë ditë. Vetëm në 12 orët e para nga nisja e sistemit dje janë regjistruar 65.000 shkelje, prej të cilave 2.800 për kalim në të kuqe dhe 1.000 për automjete të paregjistruara.

Me ndryshimet e fundit të Ligjit për Sigurinë e Trafikut Rrugor, shkeljet e dokumentuara përmes mjeteve teknike – kamera, sensorë dhe pajisje regjistrimi – llogariten si prova të vlefshme, thekson Ministria e Punëve të Brendshme, pas fillimit të periudhës njëmujore provuese të sistemit “Qytet i Sigurt”, përmes të cilit shkelësit e trafikut marrin njoftim për kundërvajtjen e evidentuar.

Në bazë të dispozitave ligjore, MPB-ja ushtron kontroll mbi drejtuesit e mjeteve dhe pjesëmarrësit e tjerë në trafik. Kontrolli kryhet përmes vrojtimit të drejtpërdrejtë dhe me përdorimin e mjeteve dhe pajisjeve përkatëse teknike. Me ndryshimet e reja ligjore, çdo shkelje e dokumentuar përmes pajisjeve teknike do të trajtohet si provë e vlefshme, dhe shkelësit e evidentuar nga sistemi “Qytet i Sigurt” do të sanksionohen sipas dispozitave për tejkalimin e shpejtësisë së lejuar, pa tolerancë – qoftë brenda apo jashtë vendbanimeve.

Gjatë periudhës provuese do të evidentohen shkelje si: tejkalimi i shpejtësisë së lejuar, kalimi në semafor të kuq, afati i skaduar i lejes së qarkullimit dhe parkimi i parregullt. Në fazën e ardhshme pritet zgjerimi i listës së shkeljeve që do të regjistrohen nga sistemi elektronik.

Për shkeljet e dokumentuara përmes “Qytet i Sigurt”, pronari i automjetit me të cilin është kryer shkelja do të marrë SMS dhe email në bazë të të dhënave të deklaruara gjatë regjistrimit të mjetit, së bashku me një link për shkarkimin e procesverbalit dhe urdhërpagesës për kundërvajtje.

Nëse personi e pranon përgjegjësinë dhe e paguan gjysmën e gjobës brenda tetë ditëve nga marrja e njoftimit, ai përfiton zbritje ligjore. Pas kalimit të afatit prej tetë ditësh, gjoba mund të paguhet në tërësi brenda tetë ditëve të tjera, para nisjes së procedurës së përmbarimit. Pas pagesës në afat, personi është i detyruar të paguajë edhe shpenzimet e procedurës.

Të huajt, si dhe shtetasit e Maqedonisë së Veriut që me largimin nga vendi tentojnë të shmangin pagesën, janë të detyruar të paguajnë gjobën menjëherë – e më së voni brenda tetë ditëve nga marrja e njoftimit. Nëse gjoba nuk paguhet, MPB-ja ia dërgon lëndën organit kompetent për përmbarim. Për shkeljet ku parashikohet edhe ndalim i të drejtës për drejtim të automjetit, pavarësisht pagesës në afat, MPB-ja do të parashtrojë kërkesë për hapje të procedurës përkatëse në gjykatë.

Gjobat mund të paguhen në mënyrë elektronike, përmes linkut të dërguar në njoftim. Urdhërpagesa gjenerohet automatikisht me numrin e procesverbalit dhe shumën e saktë në denarë. Pas pagesës, MPB-ja merr menjëherë njoftim elektronik se gjoba është paguar.

Kujtojmë se gjobat do të shqiptohen me shkeljet që do të bëhen nga 1 janari.

Lajme

Nevzat Bejta: Rikthehem në komunë, jo për politikë por për punë

Nevzat Bejta ka konfirmuar rikthimin e tij në garën për drejtimin e Komunës së Gostivarit, duke theksuar se motivi kryesor nuk është politika, por puna dhe realizimi i projekteve konkrete në interes të qytetarëve.

Në një intervistë për televizionin Alsat, Bejta deklaroi se vendimi për t’u rikthyer vjen si rezultat i përvojës dhe punëve të realizuara gjatë dy mandateve të tij si kryetar komune. Ai përmendi ndërtimin e urës lidhëse mbi lumin Vardar, rrugën Simnicë–Novosellë, hapjen e rrugës “18 Nëntori” që, sipas tij, ka liruar komunikacionin në qytet, si dhe rrugën lidhëse Vrapçisht–Çegran.

“Janë projekte konkrete, të prekshme për qytetarët. Pas fitores më 11 janar, na presin edhe shumë punë të tjera madhore”, theksoi Bejta.

Ai vlerësoi se gara për Gostivarin zhvillohet mes tij dhe kryetarit aktual Arben Taravari, duke e akuzuar këtë të fundit për, siç tha, mungesë pune dhe keqmenaxhim financiar të komunës. Sipas Bejtës, gjatë mandatit aktual janë shpenzuar mbi 30 milionë euro pa realizuar projekte konkrete, ndërsa komuna është futur edhe më thellë në borxhe.

Bejta paralajmëroi se me rikthimin e tij në krye të komunës, revizioni financiar do të jetë i pashmangshëm, me qëllim vendosjen e transparencës dhe përgjegjshmërisë.

“Po rikthehem në komunë jo për politikë, por për të punuar me ndershmëri dhe dinjitet. Synimi im është t’ia rikthejmë Gostivarit shkëlqimin në arsim, kulturë, sport dhe investime madhore”, deklaroi ai.

Në fund, Bejta u bëri thirrje qytetarëve që më 11 janar të mbështesin, sipas tij, rikthimin e krenarisë dhe zhvillimit të qytetit, duke theksuar se këtë rrugë do ta bëjnë së bashku me qytetarët e Gostivarit.

https://www.facebook.com/share/p/1GA47JsqJM/

Lajme

Klinika, kaos me terminët dhe parkingun

Në Qendrën Klinike “Nënë Tereza” qytetarët enden nga një repart në tjetrin, duke pritur me orë të tëra për një kontroll mjekësor, shpesh edhe për shërbime bazë.

Anketë me qytetar

“Boll bërllog u kon, hala ma bërllog asht. Pse? Qashtu. A prisni shumë? Si jo, tri orë katër orë, të xhumanë kamë nejt prej 8:00 n’sabah deri në 16:00 në aksham”

“Ka turmë sa të duash. Sa prisni? Që nga mëngjesi, tani mbarova…Ka shumë turmë shumë”

“Kjo është përditshmëri. Unë jam e punësuar këtu por kemi shumë pacientë, tani varet prej mjekëve, janë në sallë… ndonjëherë dinë të presin pak”

Pacientë pa fund, ndërsa parkim askund thonë qytetarët. Sipas tyre është pothuajse e pamundur të gjendet një vend i lirë, gjë që detyrohen të përdorin transportin publik, edhe pse gjendja shëndetësore nuk ua lejon.

“Parkingu është katastrofë, nuk mund të vijmë me veturë, duhet të vijmë me taksi ose me autobusë. Ka shumë rrëmujë, janë disa dilerë këtu të gjen vend të merr 100 denarë 50 denarë, policia nuk punon, katastrofë, pra parkingu është katastrofë”

“Parkingu për askund, unë erdha me autobusë, nga Gostivari jam, erdha me autobusë për shkak të parkingut. Më tregonte një shok kishte ardhur me babanë, dhe më tha se ka ardhur në orën 7 të mëngjesit dhe në orën 14 ka gjetur parking”

“Nuk përdori parking, vijë me autobusë pasi nuk ka teori të gjesh vend. Humbet gjithë ditën vetëm në parking”.

Iu drejtuam Ministrisë së Shëndetësisë, por pa përgjigje. Mungesa e organizimit, fluksi i madh i pacientëve dhe infrastruktura e pamjaftueshme po e rëndojnë edhe më shumë situatën në qendrën më të madhe shëndetësore në vend. Qytetarët kërkojnë zgjidhje urgjente, ndërsa institucionet vazhdojnë të heshtin përballë një problemi që prej kohësh nuk ka zgjidhje./Alsat.mk

Lajme

Banorët e Gazës pranuan ndihmat humanitare të dërguara nga Kosova

Banorët e Gazës kanë pranuar ndihmat humanitare të ndara nga Qeveria e Kosovës për ta dhe menjëherë ka nisur shpërndarja e ndihmave për familjet në nevojë.

Ministrja në detyrë e Punëve të Jashtme dhe Diasporës e Kosovës, Donika Gërvalla, përmes rrjeteve sociale njoftoi se autoritetet kosovare morën konfirmim se ndihmat humanitare arritën në Gaza dhe u shpërndanë tek popullata përmes partnerëve humanitarë në terren.

“Dërgesa jonë në vlerë prej 500 mijë euro përfshin tenda, pako ushqimore, batanije dhe 158 mijë racione të ushqimit të ngrohtë. E dimë që asgjë nuk e zëvendëson humbjen dhe dhimbjen atje. Por shpresojmë që kjo ndihmë modeste t’u japë sadopak mbështetje e lehtësim familjeve, sidomos fëmijëve dhe të moshuarve, në ditë kur edhe gjërat më bazike mungojnë”, shkroi Gërvalla.

Ajo falënderoi duke shprehur mirënjohjen e sinqertë për Turqisë dhe Gjysmëhënën e Kuqe Turke për “bashkëpunimin dhe mbështetjen që e bënë të mundur këtë operacion humanitar”.