Lajme

Pas Mickoskit edhe VLEN nuk e mbështetë protestën për krerët e UÇK-së

Koalicioni qeveritar VMRO-VLEN nuk e mbështetet protestën e Veteranëve të UÇK-së që do të mbahet më 13 dhjetor në Shkup në të cilën do të ngritët zëri për padrejtësitë ndaj ish krerëve të UÇK-së që po gjykohen në Hagë. Arsyeja, sipas tyre është se Ali Ahmeti po tenton të përfitojë nga kjo protestë.

Kryeministri Hristijan Mickoski, në brifing me gazetarët tha se ky hap i Ahmetit është i gabuar dhe për këtë në të ardhmen do ta ketë shumë rëndë të gjejë partner koalicioni. Mickoski shkoi më tej, duke theksuar se është i bindur që sikur ai, edhe VLEN nuk do ta mbështetë.

Koalicioni VLEN nëpërmjet një komunikate drejton gishtin nga Ali Ahmeti se po tenton të përfitojë politikisht në kurriz të kësaj proteste, duke manipuluar ndjenjat e shqiptarëve. Sipas tyre, proceset në Hagë janë çështje serioze që kërkojnë diplomaci dhe veprime institucionale të cilat Kosoava tashmë po i ndërmerr.

“Prandaj kemi përgjegjësi që këto tema të trajtohen me maturi, e jo me improvizime të një partie që është zënë ngushtë dhe sa herë gjendet në krizë manipulon ndjenjat e shqiptarëve. VLEN respekton çdo protestë që lind natyrshëm nga shqiptarët. Ajo që kundërshtojmë është përdorimi i emrit të UÇK-së për të mbuluar dështimet, aferat dhe frikën nga zhdukja politike”, thonë nga VLEN.

Lidhur me protestën, sot ka reaguar edhe personalisht Ahmeti, i cili thekson se do të dalin në mbështetje dhe mbrojtje të së vërtetës objektive për krerët e UÇK-së në Hagë.

Megjithatë, protesta është caktuar në Shkup pas një vizite të Ahmetit në hapësirat e OVL-UÇK-së më 19 nëntor, ku kryetari i kësaj shoqate Hysni Gucati i ndau mirënjohje Ahmetit.

Deklaratat e Mickoskit nga OVL-UÇK sot i quajtën përçarëse, ndërsa theksuan që qëllimi i tyre nuk është që të ndërhyjnë në politikat e tyre të brendshme.

“Deklarata që nuk tregojnë unitet të gjitha komuniteteve që jetojnë në Maqedoninë e Veriut, por më shumë përçarje, prandaj për neve kanë qenë të papranueshme sepse duke pasur parasysh faktin se këto protesta që i bëjmë, i kemi bërë edhe nëpër vende tjera dhe asnjëherë nuk kemi qëllim me ndiku në politikat e tyre të brendshme atje”, tha Gazmend Syla, Nënkryetar i OVL-UÇK.

Lidhur me protestën gjatë ditës kanë reaguar edhe nga Lëvizja Popullore e Kosovës, të cilët i ftojnë partitë të mos e keqpërdorin protestën për përfitime politike, pasi qëllimi i saj është drejtësia dhe dinjiteti, dhe jo instrumentalizimi partiak. /Alsat/

Lajme

Nevzat Bejta: Rikthehem në komunë, jo për politikë por për punë

Nevzat Bejta ka konfirmuar rikthimin e tij në garën për drejtimin e Komunës së Gostivarit, duke theksuar se motivi kryesor nuk është politika, por puna dhe realizimi i projekteve konkrete në interes të qytetarëve.

Në një intervistë për televizionin Alsat, Bejta deklaroi se vendimi për t’u rikthyer vjen si rezultat i përvojës dhe punëve të realizuara gjatë dy mandateve të tij si kryetar komune. Ai përmendi ndërtimin e urës lidhëse mbi lumin Vardar, rrugën Simnicë–Novosellë, hapjen e rrugës “18 Nëntori” që, sipas tij, ka liruar komunikacionin në qytet, si dhe rrugën lidhëse Vrapçisht–Çegran.

“Janë projekte konkrete, të prekshme për qytetarët. Pas fitores më 11 janar, na presin edhe shumë punë të tjera madhore”, theksoi Bejta.

Ai vlerësoi se gara për Gostivarin zhvillohet mes tij dhe kryetarit aktual Arben Taravari, duke e akuzuar këtë të fundit për, siç tha, mungesë pune dhe keqmenaxhim financiar të komunës. Sipas Bejtës, gjatë mandatit aktual janë shpenzuar mbi 30 milionë euro pa realizuar projekte konkrete, ndërsa komuna është futur edhe më thellë në borxhe.

Bejta paralajmëroi se me rikthimin e tij në krye të komunës, revizioni financiar do të jetë i pashmangshëm, me qëllim vendosjen e transparencës dhe përgjegjshmërisë.

“Po rikthehem në komunë jo për politikë, por për të punuar me ndershmëri dhe dinjitet. Synimi im është t’ia rikthejmë Gostivarit shkëlqimin në arsim, kulturë, sport dhe investime madhore”, deklaroi ai.

Në fund, Bejta u bëri thirrje qytetarëve që më 11 janar të mbështesin, sipas tij, rikthimin e krenarisë dhe zhvillimit të qytetit, duke theksuar se këtë rrugë do ta bëjnë së bashku me qytetarët e Gostivarit.

https://www.facebook.com/share/p/1GA47JsqJM/

Lajme

Klinika, kaos me terminët dhe parkingun

Në Qendrën Klinike “Nënë Tereza” qytetarët enden nga një repart në tjetrin, duke pritur me orë të tëra për një kontroll mjekësor, shpesh edhe për shërbime bazë.

Anketë me qytetar

“Boll bërllog u kon, hala ma bërllog asht. Pse? Qashtu. A prisni shumë? Si jo, tri orë katër orë, të xhumanë kamë nejt prej 8:00 n’sabah deri në 16:00 në aksham”

“Ka turmë sa të duash. Sa prisni? Që nga mëngjesi, tani mbarova…Ka shumë turmë shumë”

“Kjo është përditshmëri. Unë jam e punësuar këtu por kemi shumë pacientë, tani varet prej mjekëve, janë në sallë… ndonjëherë dinë të presin pak”

Pacientë pa fund, ndërsa parkim askund thonë qytetarët. Sipas tyre është pothuajse e pamundur të gjendet një vend i lirë, gjë që detyrohen të përdorin transportin publik, edhe pse gjendja shëndetësore nuk ua lejon.

“Parkingu është katastrofë, nuk mund të vijmë me veturë, duhet të vijmë me taksi ose me autobusë. Ka shumë rrëmujë, janë disa dilerë këtu të gjen vend të merr 100 denarë 50 denarë, policia nuk punon, katastrofë, pra parkingu është katastrofë”

“Parkingu për askund, unë erdha me autobusë, nga Gostivari jam, erdha me autobusë për shkak të parkingut. Më tregonte një shok kishte ardhur me babanë, dhe më tha se ka ardhur në orën 7 të mëngjesit dhe në orën 14 ka gjetur parking”

“Nuk përdori parking, vijë me autobusë pasi nuk ka teori të gjesh vend. Humbet gjithë ditën vetëm në parking”.

Iu drejtuam Ministrisë së Shëndetësisë, por pa përgjigje. Mungesa e organizimit, fluksi i madh i pacientëve dhe infrastruktura e pamjaftueshme po e rëndojnë edhe më shumë situatën në qendrën më të madhe shëndetësore në vend. Qytetarët kërkojnë zgjidhje urgjente, ndërsa institucionet vazhdojnë të heshtin përballë një problemi që prej kohësh nuk ka zgjidhje./Alsat.mk

Lajme

Banorët e Gazës pranuan ndihmat humanitare të dërguara nga Kosova

Banorët e Gazës kanë pranuar ndihmat humanitare të ndara nga Qeveria e Kosovës për ta dhe menjëherë ka nisur shpërndarja e ndihmave për familjet në nevojë.

Ministrja në detyrë e Punëve të Jashtme dhe Diasporës e Kosovës, Donika Gërvalla, përmes rrjeteve sociale njoftoi se autoritetet kosovare morën konfirmim se ndihmat humanitare arritën në Gaza dhe u shpërndanë tek popullata përmes partnerëve humanitarë në terren.

“Dërgesa jonë në vlerë prej 500 mijë euro përfshin tenda, pako ushqimore, batanije dhe 158 mijë racione të ushqimit të ngrohtë. E dimë që asgjë nuk e zëvendëson humbjen dhe dhimbjen atje. Por shpresojmë që kjo ndihmë modeste t’u japë sadopak mbështetje e lehtësim familjeve, sidomos fëmijëve dhe të moshuarve, në ditë kur edhe gjërat më bazike mungojnë”, shkroi Gërvalla.

Ajo falënderoi duke shprehur mirënjohjen e sinqertë për Turqisë dhe Gjysmëhënën e Kuqe Turke për “bashkëpunimin dhe mbështetjen që e bënë të mundur këtë operacion humanitar”.