Lajme

Iu rritë dënimi në 13 vite burg, shoferit që e përplasi për vdekje Frosinën në Shkup

Gjykata e Apelit në Shkup ka vendosur ta rrisë në 13 vjet burg dënimin për Vasil Jovanovin, i cili ishte dënuar fillimisht me 12 vjet burg për “vepra të rënda kundër sigurisë dhe personave dhe pronës në trafik”. Sipas Prokurorisë, në janar të këtij viti, duke drejtuar një automjet me shpejtësi 91 km/h, pa patentë shoferi dhe nën ndikimin e alkoolit, Jovanov kaloi në semoafor të kuq dhe goditi Frosina Kulakovën, e cila vdiq në vend.

Sipas njoftimit të Gjykatës së Apelit në Shkup, pas shqyrtimit të çështjes penale KZh-696/25 dhe mbajtjes së seancës publike më 6 tetor 2025, gjykata vendosi më 27 tetor 2025, pas konsultimeve dhe votimit në pjesën jo publike të seancës, të miratojë ankesën e Prokurorisë Themelore Publike të Shkupit dhe të refuzojë si të pabazuar ankesën e të akuzuarit V.J.

Gjykata e Apelit ndryshoi vendimin e Gjykatës Themelore Penale në pjesën e dënimit, duke vendosur që V.J., i cili me vendimin e shkallës së parë ishte shpallur fajtor për veprën penale “Vepra të rënda kundër sigurisë së njerëzve dhe pronës në trafik” sipas nenit 300 paragrafi 2 në lidhje me nenin 297 paragrafi 1 të Kodit Penal, të dënohet me 13 vjet burg.

Në pjesën tjetër, vendimi fillestar mbetet i njëjtë.

Fillimisht, Gjykata Themelore Penale në Shkup në maj të këtij viti e shpalli Jovanovin fajtor për aksidentin rrugor në bulevardin “Aradhet Partizane” në Shkup, në të cilin humbi jetën 22-vjeçarja Frosina Kulakova.

Gjykata në atë kohë e dënoi me 12 vjet burg, ndalim për të drejtuar automjet për pesë vjet dhe gjobë, duke marrë parasysh pranimin e fajit dhe pendesën si rrethana lehtësuese, dhe duke konsideruar si rrethana rënduese: drejtimin pa leje, nën ndikimin e alkoolit, kalimin me dritë të kuqe dhe dënimin e mëparshëm për tregti të palejuar me drogë.

Sipas aktakuzës, më 29 janar, Jovanov drejtoi automjetin me 91 km/h, pa leje dhe nën ndikimin e alkoolit, duke kaluar me dritë të kuqe në një kalim për këmbësorë dhe goditi Kulakovën, e cila po kalonte në dritë të gjelbër. Ajo vdiq menjëherë nga goditja. Për këtë vepër penale parashikohet dënim deri në 20 vjet burg.

Ndërkohë, Gjykata Themelore Penale në Shkup ka nisur proces edhe ndaj babait të Vasil Jovanovit, Zoran Jovanov, për veprën penale “kërcënim i sigurisë në trafik me veprim ose mjete të rrezikshme”, pasi gjatë periudhës nga nëntori 2022 deri në janar 2025 i kishte lejuar djalit të tij të drejtonte automjet pa leje, duke ditur se ishte recidivist në shkelje trafiku, çka sipas Prokurorisë kontribuoi në aksidentin tragjik ku humbi jetën Frosina Kulakova.

Lajme

Nevzat Bejta: Rikthehem në komunë, jo për politikë por për punë

Nevzat Bejta ka konfirmuar rikthimin e tij në garën për drejtimin e Komunës së Gostivarit, duke theksuar se motivi kryesor nuk është politika, por puna dhe realizimi i projekteve konkrete në interes të qytetarëve.

Në një intervistë për televizionin Alsat, Bejta deklaroi se vendimi për t’u rikthyer vjen si rezultat i përvojës dhe punëve të realizuara gjatë dy mandateve të tij si kryetar komune. Ai përmendi ndërtimin e urës lidhëse mbi lumin Vardar, rrugën Simnicë–Novosellë, hapjen e rrugës “18 Nëntori” që, sipas tij, ka liruar komunikacionin në qytet, si dhe rrugën lidhëse Vrapçisht–Çegran.

“Janë projekte konkrete, të prekshme për qytetarët. Pas fitores më 11 janar, na presin edhe shumë punë të tjera madhore”, theksoi Bejta.

Ai vlerësoi se gara për Gostivarin zhvillohet mes tij dhe kryetarit aktual Arben Taravari, duke e akuzuar këtë të fundit për, siç tha, mungesë pune dhe keqmenaxhim financiar të komunës. Sipas Bejtës, gjatë mandatit aktual janë shpenzuar mbi 30 milionë euro pa realizuar projekte konkrete, ndërsa komuna është futur edhe më thellë në borxhe.

Bejta paralajmëroi se me rikthimin e tij në krye të komunës, revizioni financiar do të jetë i pashmangshëm, me qëllim vendosjen e transparencës dhe përgjegjshmërisë.

“Po rikthehem në komunë jo për politikë, por për të punuar me ndershmëri dhe dinjitet. Synimi im është t’ia rikthejmë Gostivarit shkëlqimin në arsim, kulturë, sport dhe investime madhore”, deklaroi ai.

Në fund, Bejta u bëri thirrje qytetarëve që më 11 janar të mbështesin, sipas tij, rikthimin e krenarisë dhe zhvillimit të qytetit, duke theksuar se këtë rrugë do ta bëjnë së bashku me qytetarët e Gostivarit.

https://www.facebook.com/share/p/1GA47JsqJM/

Lajme

Klinika, kaos me terminët dhe parkingun

Në Qendrën Klinike “Nënë Tereza” qytetarët enden nga një repart në tjetrin, duke pritur me orë të tëra për një kontroll mjekësor, shpesh edhe për shërbime bazë.

Anketë me qytetar

“Boll bërllog u kon, hala ma bërllog asht. Pse? Qashtu. A prisni shumë? Si jo, tri orë katër orë, të xhumanë kamë nejt prej 8:00 n’sabah deri në 16:00 në aksham”

“Ka turmë sa të duash. Sa prisni? Që nga mëngjesi, tani mbarova…Ka shumë turmë shumë”

“Kjo është përditshmëri. Unë jam e punësuar këtu por kemi shumë pacientë, tani varet prej mjekëve, janë në sallë… ndonjëherë dinë të presin pak”

Pacientë pa fund, ndërsa parkim askund thonë qytetarët. Sipas tyre është pothuajse e pamundur të gjendet një vend i lirë, gjë që detyrohen të përdorin transportin publik, edhe pse gjendja shëndetësore nuk ua lejon.

“Parkingu është katastrofë, nuk mund të vijmë me veturë, duhet të vijmë me taksi ose me autobusë. Ka shumë rrëmujë, janë disa dilerë këtu të gjen vend të merr 100 denarë 50 denarë, policia nuk punon, katastrofë, pra parkingu është katastrofë”

“Parkingu për askund, unë erdha me autobusë, nga Gostivari jam, erdha me autobusë për shkak të parkingut. Më tregonte një shok kishte ardhur me babanë, dhe më tha se ka ardhur në orën 7 të mëngjesit dhe në orën 14 ka gjetur parking”

“Nuk përdori parking, vijë me autobusë pasi nuk ka teori të gjesh vend. Humbet gjithë ditën vetëm në parking”.

Iu drejtuam Ministrisë së Shëndetësisë, por pa përgjigje. Mungesa e organizimit, fluksi i madh i pacientëve dhe infrastruktura e pamjaftueshme po e rëndojnë edhe më shumë situatën në qendrën më të madhe shëndetësore në vend. Qytetarët kërkojnë zgjidhje urgjente, ndërsa institucionet vazhdojnë të heshtin përballë një problemi që prej kohësh nuk ka zgjidhje./Alsat.mk

Lajme

Banorët e Gazës pranuan ndihmat humanitare të dërguara nga Kosova

Banorët e Gazës kanë pranuar ndihmat humanitare të ndara nga Qeveria e Kosovës për ta dhe menjëherë ka nisur shpërndarja e ndihmave për familjet në nevojë.

Ministrja në detyrë e Punëve të Jashtme dhe Diasporës e Kosovës, Donika Gërvalla, përmes rrjeteve sociale njoftoi se autoritetet kosovare morën konfirmim se ndihmat humanitare arritën në Gaza dhe u shpërndanë tek popullata përmes partnerëve humanitarë në terren.

“Dërgesa jonë në vlerë prej 500 mijë euro përfshin tenda, pako ushqimore, batanije dhe 158 mijë racione të ushqimit të ngrohtë. E dimë që asgjë nuk e zëvendëson humbjen dhe dhimbjen atje. Por shpresojmë që kjo ndihmë modeste t’u japë sadopak mbështetje e lehtësim familjeve, sidomos fëmijëve dhe të moshuarve, në ditë kur edhe gjërat më bazike mungojnë”, shkroi Gërvalla.

Ajo falënderoi duke shprehur mirënjohjen e sinqertë për Turqisë dhe Gjysmëhënën e Kuqe Turke për “bashkëpunimin dhe mbështetjen që e bënë të mundur këtë operacion humanitar”.