Kandidatja për deputete e PDK Ariana Musliu Shoshi realizoi një vizitë pune në kompaninë Walone në Kosovë, e cila po vlerësohet si një shembull i shkëlqyer i inovacionit, profesionalizmit dhe vizionit sipërmarrës.

Gjatë vizitës, Musliu Shoshi theksoi se kompani si Walone janë dëshmi e qartë se Kosova ka potencial, dije dhe energji për të konkurruar me sukses në tregjet vendore dhe ndërkombëtare, duke krijuar njëkohësisht vende të reja pune dhe duke kontribuar në forcimin e ekonomisë së vendit.

Ajo nënvizoi se mbështetja e bizneseve vendore dhe e sipërmarrjes është një investim i drejtpërdrejtë në të ardhmen e Kosovës, duke përforcuar zhvillimin ekonomik dhe qëndrueshmërinë sociale.

Vizita u cilësua si frymëzuese dhe motivuese, veçanërisht për të rinjtë dhe sipërmarrësit që synojnë të ndërtojnë biznese të suksesshme në vend.

https://www.facebook.com/share/p/17Z8XszeJi/

Nesër në Shkup BDI do ta mbajë Kongresin partiak, megjithatë në komunikatën zyrtare të partisë nuk jepen detaje për rendin e ditës. Ajo që dihet zyrtarisht është se Ali Ahmeti pritet të rizgjidhet në krye të partisë, pasi nuk është paraqitur asnjë kundërkandidat, shkruan Alsat.

Kongresi, që sipas informimit zyrtar është i rregullt, mbahet menjëherë pas përfundimit të zgjedhjeve lokale ku BDI pati rezultat të dobët, meqenëse humbi udhëheqjen e shumicës së komunave shqiptare.

Për këtë, në opinion, por edhe brenda BDI-së kishte thirrje për përgjegjësi lidhur me rezultatin zgjedhor, duke e drejtuar gishtin kah funksionarët që mbi dy dekada kanë dominuar skenën politike nën logon e BDI-së, duke ushtruar funksione të larta në të gjitha nivelet e pushtetit.

Duke e pasur parasysh rezultatin e dobët në zgjedhjet lokale, por edhe zërat brenda partisë, jozyrtarisht Ahmeti ka hartuar një listë me emra të njohur që pritet të zëvendësohen me emra të rinj. Megjithatë një lëvizje e këtillë, nuk është e qartë nëse çon partinë drejt reformës, apo megjithatë është një lëvizje taktike duke e lënë “gardën e vjetër” të punojë në prapaskenë.

Jozyrtarisht, në listë janë anëtarët që ushtrojnë funksione të larta partiake, respektivisht sekretari organizativ Blerim Bexheti, anëtari i Këshillit Mbikëqyrës, Musa Xhaferi, anëtari i Këshillit Kombëtar Sadulla Duraku. Më tej, listës pritet t’i shtohen edhe anëtarët e Kryesisë Fatmir Dehari, Teuta Arifi, Bekim Neziri, Xhevat Ademi, Resi Abdurramani, Ejup Alimi, Bilen Saliji, Ejup Rustemi e të tjerë.

BDI, në periudhën e kaluar u godit edhe nga vendimet e Departamentit Amerikan të Shtetit, me të cilat fillimisht funksionarin e lartë partiak Ramiz Merko e futën në Listë të Zezë, ndërsa më pas Artan Grubin, apo krahun e djathtë të Ahmetit. Për dallim prej Merkos që endet nëpër gjykata, Grubi mbi një vit ndodhet në arrati.

Shkup, 19 dhjetor – Komisioni Shtetëror Zgjedhor (KSHZ) sot finalizoi Listën Zgjedhore për zgjedhjet e përsëritura për kryetar komune në komunat Gostivar, Mavrovë Rostushë, Vrapçishtë dhe Qendër Zhupë. Zgjedhjet do të mbahen menjëherë pas festave të Vitit të Ri dhe Krishtlindjeve më 11 janar 2026. Në Gostivar, në Listën Zgjedhore janë të regjistruar 82.870 qytetarë me të drejtë vote, 78.185 votues janë banorë të përhershëm të komunës, 4.604 votues janë të regjistruar në Listën e posaçme zgjedhore për personat që jetojnë jashtë vendit, ndërsa 81 persona janë në burg ose në paraburgim.

Në Listën Zgjedhore për Mavrovë Rostushë janë regjistruar 10.575, nga të cilët në Listën e Posaçme Zgjedhore për banorë në Komunë 9.622, në vendet e huaja 951, ndërsa në burg ose në paraburgim janë dy.

Në Listën Zgjedhore për Vrapçishten janë regjistruar 27.279 qytetarë me të drejtë vote, 26.318 në Listën e veçantë zgjedhore për banorë të Komunës, në Listën e veçantë zgjedhore për votues të cilët jetojnë në vendet e huaja janë regjistruar 950, ndërsa 11 në burg ose paraburgim. Numri i votuesve në Qendër Zhupë të regjistruar në listën Zgjedhore është 7.562, prej tyre 6.305 në komunë, në Listën e posaçme zgjedhore për votues në vendet e huaja janë regjistruar 1257 persona. KSHZ e miratoi Udhëzimin për votim në vendvotimet me më pak se dhjetë votues. Të tillë ka dy në Gostivar dhe atë 0480 (7) dhe 0154 (3) dhe në Mavrovë Rostushe pesë:  0463 (6), 0482 (5), 0484 (5), 0485 (8) dhe 0485 (5).

Kryetari i KSHZ-së Boris Kondarko, duke i theksuar udhëzimet theksoi se KSHZ në katër komuna duhet ta organizojë votimin që t’u mundësohet këtyre personave në vendvotimet më të afërta ta realizojnë të drejtën e tyre të votës. “KSHZ aktualisht i zbaton të gjitha aktivitetet për realizimin e zgjedhjeve më 11 janar”, theksoi Kondarko.