Lajme

Bujar Osmani: Në Çair do të vendoset nëse do të mbetemi popull shtetformues apo do të bëhemi të nënshtruar

Kandidati për kryetar të komunës së Çairit, Bujar Osmani, në fjalimin e tij para qytetarëve theksoi se zgjedhjet në Çair do të jenë vendimtare jo vetëm për komunën, por edhe për të ardhmen e shqiptarëve në shtet.

“Pse, do të më thoni, nga Çairi varen të gjitha zhvillimet e mëdha? Sepse këto 15 muaj, Çairi është shndërruar në një laborator për eksperimentimin e disa politikave që janë shumë të rrezikshme për ne. Dhe kjo nuk ka filluar sot, nuk ka filluar këtu në Çair. Ka filluar para 20 vitesh: nga BDI kanë dalë 13 parti politike. E gjitha kjo me qëllim që të na ndajnë në parti të vogla. Nisma e fundit që ka filluar këtu në Çair është vazhdim i atij projekti për rrëzimin e shtëpisë së madhe dhe ndërtimin e kasolleve të vogla që më pas dikush mund t’i manipulojë”, tha Osmani.

Ai paralajmëroi se po tentohet të legjitimohet koncepti i të ashtuquajturave “parti të lagjes”, që çojnë drejt përçarjes së shqiptarëve.

“Po përpiqen të legjitimojnë konceptin që çdo komunë duhet të ketë partinë e vet, çdo lagje liderin e vet. Dhe nga zgjedhjet në Çair do të varet nëse do të lejojmë politikën e partive të vogla komunale apo do ta ruajmë forcën e partive të mëdha që treguan se mund të na sjellin deri edhe te kryeministri, dhe te një pozitë e fortë për ne këtu”, theksoi Osmani.

Sipas tij, kjo është çështje e shtetformësisë dhe e së ardhmes së shqiptarëve.

“Do të vihet në provë beteja mes konceptit të shtetformësisë dhe nënshtrimit. Dallimi është i qartë: pronari i shtëpisë vendos, ndërsa qiramarrësi vetëm paguan qiranë. E këtu, disa po e paguajnë qiranë me arritjet më të shenjta që janë fituar me gjak, djersë dhe mund gjatë 20 viteve të fundit”, deklaroi Osmani.

Osmani porositi se Çairi është vendi ku do të vendoset nëse shqiptarët do të mbeten popull që vetë përcakton të ardhmen e tij, apo do të vihet në pozitë të nënshtruar.

“Në Çair do të vendoset nëse do ta legjitimojmë politikën e rrugës drejt Bashkimit Evropian apo do të pranojmë konceptin e ‘pronarit dhe qiramarrësit’, nëse do të vazhdojmë drejt Evropës apo do të kthehemi në ‘botën serbe’”, porositi Osmani.

Lajme

JASHTË NORMALES: 24 vjeçari nga Shkupi tërhoqi zvarrë nënën me automjetin e tij

Më 25.07.2026, në orën 20:30, në një fshat të Komunës së Petrovecit në Maqedoninë e Veriut nëpunës policorë të SPB Shkup e privuan nga liria R.D. (24) nga një fshat i rajonit të Shkupit, transmeton Zyrtare.net

Ai dyshohet se rreth orës 18:50, në fshat, përmes dritares së hapur të automjetit të udhëtarëve „Fiat“ me targa të Shkupit, e kishte kapur nënën e tij 42-vjeçare dhe e kishte tërhequr me automjet rreth 20 metra, pas çka ishte larguar nga vendi i ngjarjes.

Gruaja ka pësuar lëndime trupore dhe u dërgua në Institucionin e Shëndetit Publik „Shën Naum Ohridski“ për t’iu ofruar ndihmë mjekësore. Pas dokumentimit të plotë të rastit, ndaj tij do të parashtrohet kallëzimi përkatës.

Lajme

Ohri dhe Struga strehë nga i nxehti, turistët ankohen për çmimet

Shpëtimi i vetëm nga moti i nxehtë këtë verë janë plazhet në Strugë dhe Ohër. Gastronomët shpresojnë që moti i mirë dhe uji i ngrohtë i liqenit prej 24 gradësh do të sjellin edhe më shumë mysafirë në periudhën e ardhshme. Ata me të cilët biseduam thonë se ishin të lumtur që zgjodhën Strugën dhe Ohrin për pushimet e tyre.

“Erdhëm nga Prishtina për pushime në Strugë. Do të qëndrojmë gjithsej 30 ditë. Struga është një qytet i bukur, siç thonë në maqedonisht, nuk ka tjetër si Struga. Vijmë çdo vit. Për shkak të natyrës, njerëzve, plazheve. Ndihemi si në shtëpi. Nuk qëndrojmë në hotele, por në akomodime private. Qyteti mund të ishte më i pastër, ashtu si edhe plazhet”, tha një turist.

“Kjo është një bukuri që nuk gjendet kudo. Nuk e di se si agjencitë turistike nuk tërheqin më shumë vizitorë.” A kishte më shumë mysafirë këtë fundjavë?” Ata vijnë e shkojnë në ato ditë dhe plazhi duket më mirë, ndërsa të dielave është më pak i mbushur me njerëz. Çmimet duhet të jenë më normale nga ç’janë”, tha një turist tjetër.

“Uji është i bukur, nuk mund të jetë më i bukur. Është i ngrohtë, shumë i ngrohtë. Ne jemi nga Shkupi, kemi pasur një apartament këtu, që nga koha e Jugosllavisë dhe gjithmonë qëndrojmë këtu gjatë gjithë verës”, u shpreh turisti.

Ndërkohë disa vizitorë ankohen për çmimet e larta.

“Nuk është vetëm në Ohër, shko në Shkup, është njësoj. Çmimet janë të larta kudo. Është normale që restorantet të jenë të shtrenjta, është vend turistik. Kudo që të shkosh në Evropë, çmimet në restorante janë më të shtrenjta. Por pagat e tyre janë të larta dhe ata mund të përballojnë të shkojnë në restorant. Këtu ulesh, 500 denarë është një porcion për të ngrënë, dhe dy kafe janë 300 denarë”, shprehet një turist.

Nga ana tjetër operatorët e varkave në Strugë ankohen se çdo verë numri i vizitorëve po ulet. Ata thonë se të dielave, plazhet janë pothuajse gjysmë të zbrazëta.

“Nuk është ashtu siç duhet të jetë. Njerëzit shkojnë në vende të tjera, si në Shqipëri, Turqi, Greqi, dhe shohim që disa mysafirë që vijnë çdo vit thonë se këtë vit nuk do të vijmë në Strugë dhe Ohër, do të shkojmë në vende të tjera. Ata ankohen edhe për çmimet, duke thënë se janë të larta. Plazhet janë pjesërisht të dobëta, mysafirët janë të varfër, restorantet gjithashtu. Gjatë ditës plazhet janë bosh. Nuk është si vitet e tjera, larg asaj”, deklaroi
Nenad Guçeski-operator i varkave.

Numri më i madh i pushuesve në Ohër dhe Strugë, si këtë vit, pritet të jetë para dhe pas festave të Ilindenit, kur janë planifikuar koncerte të shumta nga këngëtarë dhe grupe vendase dhe fqinje, përfshirë Rita Orën, e cila do të performojë në Ohër më 1 gusht./Alsat.mk.

Lajme

Vjedhje prej 5 milionë eurosh në një nënstacion hekurudhor në Shkup

Në nënstacionin për tërheqje elektrike në Draçevë, mes stacioneve hekurudhore Lisiçe dhe Draçevë, është kryer një vjedhje e përmasave të mëdha, gjatë së cilës është shkatërruar një pjesë e konsiderueshme e pajisjeve elektroenergjetike, njoftoi Ndërmarrja për Infrastrukturë Hekurudhore.

Sipas informacioneve, hajdutët kanë rrëzuar me forcë dy transformatorë me peshë mbi 30 tonë, kanë derdhur vajin e transformatorëve dhe kanë vjedhur mbështjelljet e bakrit, si dhe tela bakri, shina dhe pajisje të tjera të domosdoshme për funksionimin e nënstacionit, i cili tani është plotësisht jashtë funksionit.

Nga ndërmarrja vlerësojnë se bëhet fjalë për një sulm serioz ndaj infrastrukturës kritike hekurudhore, me një dëm material të vlerësuar fillimisht rreth 5 milionë euro. Ata kërkojnë një hetim urgjent dhe përgjegjësi penale për autorët dhe për të gjithë ata që kanë qenë të përfshirë në vjedhje dhe në tjetërsimin e mëtejshëm të materialeve të vjedhura.